തിരുവനന്തപുരം: സംസ്ഥാനത്ത് തുലാവർഷം ശക്തമാകുന്നതിനിടെ തിരുവനന്തപുരം നെയ്യാറ്റിൻകരയിൽ മതിൽ ഇടിഞ്ഞുവീണ് വൃദ്ധ മരിച്ചു. പൊഴിയൂർ ഉച്ചക്കട സ്വദേശിനി സരോജിനി (70) ആണ് മരിച്ചത്. ഇന്ന് രാവിലെയാണ് സംഭവം.(Tragedy in the capital during heavy rains, Elderly woman dies after wall collapses)
റിട്ടയേർഡ് എസ്.പി. ഭാഗ്യനാഥന്റെ വീടിന്റെ മതിലാണ് കനത്ത മഴയിൽ ഇടിഞ്ഞുവീണത്. വീട്ടിൽ നിന്ന് കടയിലേക്ക് പോകുന്ന വഴിയിലാണ് സരോജിനിക്ക് അപകടം സംഭവിച്ചത്. ഒറ്റയ്ക്ക് താമസിച്ചിരുന്ന സരോജിനിയെ കാണാതായതോടെ നാട്ടുകാർ തിരച്ചിൽ ആരംഭിച്ചു. തുടർന്ന് നടത്തിയ അന്വേഷണത്തിലാണ് മതിൽ ഇടിഞ്ഞുകിടക്കുന്ന സ്ഥലത്ത് മൃതദേഹം കണ്ടെത്തിയത്. മതിൽ ഇടിഞ്ഞ് ദേഹത്തേക്ക് വീഴുകയായിരുന്നു എന്നാണ് പ്രാഥമിക നിഗമനം.
ഉടൻ തന്നെ സരോജിനിയെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം ആശുപത്രിയിലേക്ക് മാറ്റി. കഴിഞ്ഞ രണ്ടു ദിവസമായി പ്രദേശത്ത് കനത്ത മഴ തുടരുകയാണ്. തുലാവർഷം സംസ്ഥാനത്ത് കനക്കുമെന്നാണ് നിലവിലെ കാലാവസ്ഥാ റിപ്പോർട്ടുകൾ.