ന്യൂഡൽഹി: ടി.പി. ചന്ദ്രശേഖരൻ വധക്കേസിൽ ഹൈക്കോടതി ശിക്ഷിച്ച പ്രതി ജ്യോതി ബാബുവിന് ജാമ്യം അനുവദിക്കുന്നതിനെ സുപ്രീം കോടതിയിൽ ശക്തമായി എതിർത്ത് സംസ്ഥാന സർക്കാർ (TP Chandrasekharan Case). ഇത്തരം ഹീനമായ കുറ്റകൃത്യങ്ങളിൽ ഏർപ്പെട്ടവർക്ക് ജാമ്യം നൽകുന്നത് സമൂഹത്തിന് തെറ്റായ സന്ദേശം നൽകുമെന്ന് സർക്കാർ കോടതിയെ അറിയിച്ചു. സിപിഎം കുന്നോത്തുപറമ്പ് മുൻ ലോക്കൽ കമ്മിറ്റി അംഗമായ ജ്യോതി ബാബു, തന്റെ ആരോഗ്യനില മോശമാണെന്ന് ചൂണ്ടിക്കാട്ടിയാണ് ജാമ്യാപേക്ഷ സമർപ്പിച്ചത്.
ജ്യോതി ബാബുവിന്റെ ചികിത്സാ വിവരങ്ങൾ ഹാജരാക്കാൻ നേരത്തെ സുപ്രീം കോടതി നിർദ്ദേശിച്ചിരുന്നു. ഇതിന്റെ അടിസ്ഥാനത്തിൽ സ്റ്റാൻഡിങ് കോൺസൽ നിഷേ രാജൻ ഷോങ്കർ ഫയൽ ചെയ്ത സത്യവാങ്മൂലത്തിലാണ് സർക്കാർ നിലപാട് വ്യക്തമാക്കിയത്. ജ്യോതി ബാബുവിന് ആവശ്യമായ എല്ലാ ചികിത്സാ സൗകര്യങ്ങളും ജയിൽ അധികൃതർ ഉറപ്പാക്കുന്നുണ്ടെന്നും അതിനാൽ ആരോഗ്യപരമായ കാരണങ്ങളാൽ ജാമ്യം അനുവദിക്കേണ്ട സാഹചര്യമില്ലെന്നും സർക്കാർ ചൂണ്ടിക്കാട്ടി. ജയിൽ ഡോക്ടർമാരുടെ മേൽനോട്ടത്തിൽ കൃത്യമായ ഇടവേളകളിൽ പരിശോധനകൾ നടക്കുന്നുണ്ടെന്നും സത്യവാങ്മൂലത്തിൽ പറയുന്നു.
ടിപി കേസിലെ കുറ്റവാളികളെ സംരക്ഷിക്കാൻ സർക്കാർ ഒത്തുകളിക്കുന്നുവെന്ന് കെ.കെ. രമ എംഎൽഎ കഴിഞ്ഞ ദിവസം കോടതിയിൽ ആരോപിച്ചിരുന്നു. പ്രതികളുടെ ജാമ്യത്തെ പോലും സർക്കാർ എതിർക്കുന്നില്ലെന്ന രമയുടെ അഭിഭാഷകന്റെ വിമർശനത്തിന് പിന്നാലെയാണ് സർക്കാർ ഇപ്പോൾ കർക്കശമായ നിലപാട് സ്വീകരിച്ചിരിക്കുന്നത്. ഗാലറിക്ക് വേണ്ടിയുള്ള ആരോപണങ്ങളാണ് രമ ഉന്നയിക്കുന്നതെന്നായിരുന്നു അന്ന് സർക്കാർ കോടതിയിൽ പ്രതികരിച്ചത്. ജ്യോതി ബാബുവിന്റെ ജാമ്യാപേക്ഷ സുപ്രീം കോടതി ഉടൻ പരിഗണിക്കും.
The Kerala government has filed an affidavit in the Supreme Court opposing the bail plea of Jyothi Babu, a convict in the T.P. Chandrasekharan murder case. Challenging the plea made on health grounds, the state argued that granting bail for such a heinous crime would send a wrong message to society. The government assured the court that the former CPI(M) leader is receiving adequate medical care within the prison, following accusations from K.K. Rema that the state was colluding with the convicts.