തൃശ്ശൂർ: റെയിൽവേ സ്റ്റേഷനിലെ പാർക്കിംഗ് ലോട്ടിലുണ്ടായ വൻ തീപിടിത്തത്തിൽ അഞ്ഞൂറോളം ഇരുചക്ര വാഹനങ്ങൾ കത്തിനശിച്ചു. സംഭവത്തിൽ കരാർ കമ്പനിയുടെ ഭാഗത്തുനിന്ന് ഗുരുതരമായ സുരക്ഷാ വീഴ്ചയുണ്ടായതായി പ്രാഥമിക അന്വേഷണത്തിൽ കണ്ടെത്തി. ദുരന്തത്തെക്കുറിച്ച് അന്വേഷിക്കാൻ തൃശ്ശൂർ സിറ്റി പോലീസ് കമ്മീഷണറുടെ നേതൃത്വത്തിൽ പ്രത്യേക സംഘത്തെ നിയോഗിച്ചു.(Thrissur railway station fire, Serious safety lapse found)
തീപിടിത്തം ഉണ്ടായപ്പോൾ അത് അണയ്ക്കാൻ ആവശ്യമായ അഗ്നിശമന ഉപകരണങ്ങൾ പാർക്കിംഗ് ലോട്ടിൽ ഉണ്ടായിരുന്നില്ല. മതിയായ പരിശീലനം ലഭിച്ച ജീവനക്കാരെയല്ല കരാർ കമ്പനി നിയമിച്ചിരുന്നതെന്നും ആക്ഷേപമുണ്ട്.
തീ പടരാൻ തുടങ്ങിയ ഉടനെ ഫയർഫോഴ്സിനെ വിവരമറിയിക്കുന്നതിൽ അധികൃതർക്ക് വീഴ്ച പറ്റി. രണ്ട് ബൈക്കുകളിൽ മാത്രം തീ പിടിച്ച ഘട്ടത്തിൽ അത് അണയ്ക്കാൻ സാധിക്കുമായിരുന്നുവെന്ന് ദൃക്സാക്ഷികൾ പറയുന്നു. റെയിൽവേ പാർക്കിംഗ് ലോട്ട് പ്രവർത്തിച്ചിരുന്നത് കോർപ്പറേഷന്റെ അനുമതിയില്ലാതെയാണെന്നാണ് വിവരം. സംഭവത്തിൽ റെയിൽവേക്ക് കോർപ്പറേഷൻ നോട്ടീസ് നൽകും.