കുറ്റ്യാടി: 'ആത്മീയ ചികിത്സ'യുടെ മറവിൽ രണ്ടുകോടി രൂപയോളം തട്ടിയെടുത്ത കേസിൽ മൂന്നുപേരെ തൊട്ടിൽപ്പാലം പോലീസ് അറസ്റ്റ് ചെയ്തു. മലപ്പുറം സ്വദേശികളായ പി.സി.എച്ച്. ശംസുദ്ദീൻ (43), എം.കെ. മുഹമ്മദ് ബഷീർ (39), റഫീഖ് (49) എന്നിവരാണ് അറസ്റ്റിലായത്. തളീക്കര മണിയലംകണ്ടി മുഹമ്മദ് ആദിലിന്റെ പരാതിയെ തുടർന്നാണ് പോലീസ് കേസെടുത്തത്. പല തവണയായി വാങ്ങിയ തുകയിൽ ഒന്നേമുക്കാൽ കോടിയോളം രൂപ ആദിലിന് തിരിച്ചുനൽകാനുണ്ട്. വ്യാജ ചികിത്സ, ആത്മീയ ചൂഷണത്തിൻ്റെ മറവിലുള്ള സാമ്പത്തിക തട്ടിപ്പ് എന്നിവ സംബന്ധിച്ച് ആദിൽ മുഖ്യമന്ത്രിക്ക് നൽകിയ പരാതിയുടെ അടിസ്ഥാനത്തിലാണ് പോലീസ് നടപടി സ്വീകരിച്ചത്.
ബന്ധുവിൻ്റെ ചികിത്സയുമായി ബന്ധപ്പെട്ടാണ് ആദിൽ പ്രതികളെ സമീപിച്ചത്. ശംസുദ്ദീൻ ഉസ്താദും ശൈഖുമാണെന്ന് പറഞ്ഞ് പരിചയപ്പെടുത്തിയും മാരകരോഗങ്ങൾ വരെ സുഖപ്പെടുത്തിയിട്ടുണ്ടെന്ന് വിശ്വസിപ്പിച്ചുമാണ് പണം കൈക്കലാക്കിയത്. പണം തിരികെ ചോദിച്ചപ്പോൾ രോഗം മൂർച്ഛിക്കുമെന്നും ഭവിഷ്യത്ത് നേരിടേണ്ടിവരുമെന്നും പ്രതികൾ ഭീഷണിപ്പെടുത്തി.
ആദിലിന് ലഭിച്ചത് 26 ലക്ഷം രൂപ മാത്രമാണ്. ബാക്കി തുക പ്രതികളുടെ അക്കൗണ്ടിലേക്കാണ് അയച്ചത്. പ്രതികളിൽ ശംസുദ്ദീൻ മലപ്പുറത്തെ ഒരു വിദ്യാഭ്യാസ സ്ഥാപന ട്രസ്റ്റ് വൈസ് പ്രസിഡൻ്റും ബഷീർ പ്രിൻസിപ്പലുമാണെന്ന് വിശ്വസിപ്പിച്ചതായും പരാതിയിൽ പറയുന്നു. പ്രതികൾ നേരത്തേ കോഴിക്കോട് സെഷൻസ് കോടതിയിൽ മുൻകൂർ ജാമ്യാപേക്ഷ നൽകിയതിനാൽ, കോടതി നിർദ്ദേശിച്ച ഉപാധികളോടെ ജാമ്യം ലഭിച്ചിട്ടുണ്ട്. ഇതിനെതിരെ ഹൈക്കോടതിയെ സമീപിക്കുമെന്ന് ആദിൽ അറിയിച്ചു.