കൊച്ചി: രാജ്യത്ത് ക്രൈസ്തവർക്ക് നേരെ വർധിച്ചുവരുന്ന അതിക്രമങ്ങൾ ഗൗരവകരമാണെന്ന് മന്ത്രി പി. രാജീവ് പറഞ്ഞു. ക്രിസ്മസ് ദിനത്തിൽ കരോൾ സംഘങ്ങളെ ആക്രമിക്കുന്നതും കേക്കുമായി എത്തുന്നവരെ തടയുന്നതും ജനാധിപത്യ സമൂഹത്തിന് ചേർന്നതല്ല. ഇത്തരം നീക്കങ്ങൾ ഭരണഘടനാ മൂല്യങ്ങളെ തകർക്കുന്നതാണെന്നും അദ്ദേഹം കൂട്ടിച്ചേർത്തു.(Those who came with Christmas cakes have changed their behavior to attacking people when they see carols, says Minister P Rajeev)
ക്രിസ്മസ് കേക്കുമായി ചെന്ന ആളുകൾ കരോൾ കണ്ടാൽ ആക്രമിക്കുന്ന രീതിയിലേക്ക് മാറിയെന്ന് അദ്ദേഹം ചൂണ്ടിക്കാട്ടി. കളമശ്ശേരി എച്ച്.എം.ടി യൂണിറ്റിന്റെ വൈദ്യുതി ബന്ധം കെ.എസ്.ഇ.ബി വിച്ഛേദിച്ച സംഭവത്തിൽ സംസ്ഥാന സർക്കാർ അടിയന്തരമായി ഇടപെട്ടെന്ന് മന്ത്രി അറിയിച്ചു. വൈദ്യുതി മന്ത്രി കെ. കൃഷ്ണൻകുട്ടിയുമായി നടത്തിയ ചർച്ചയെത്തുടർന്ന് ബുധനാഴ്ച രാത്രിയോടെ തന്നെ എച്ച്.എം.ടി-യിലെ വൈദ്യുതി ബന്ധം പുനസ്ഥാപിച്ചു.
ഏകദേശം 30 കോടി രൂപയുടെ കുടിശ്ശികയാണ് എച്ച്.എം.ടി വരുത്തിയിരിക്കുന്നത്. കേന്ദ്രസർക്കാരിൽ നിന്ന് യാതൊരുവിധ സാമ്പത്തിക സഹായവും ഈ പൊതുമേഖലാ സ്ഥാപനത്തിന് ലഭിക്കുന്നില്ല. കേന്ദ്രമന്ത്രി നേരിട്ടെത്തി പ്രഖ്യാപിച്ച പാക്കേജ് പോലും ഇതുവരെ നടപ്പിലായിട്ടില്ല. എച്ച്.എം.ടി സി.എം.ഡി ഇത്തരം കടുംപിടുത്തങ്ങൾ ഒഴിവാക്കണമെന്നും മന്ത്രി ആവശ്യപ്പെട്ടു.