തിരുവനന്തപുരം: പോക്സോ തീർപ്പാക്കുന്നതിൽ കേരളത്തിൽ വൻ കാലതാമസം. സംസ്ഥാനത്ത് തീർപ്പുകൽപ്പിക്കാത്ത പോക്സോ കേസുകൾ ഏറ്റവും അധികമുള്ളത് തലസ്ഥാന ജില്ലയായ തിരുവനന്തപുരത്താണ്. ഈ വർഷം ജൂലൈ 31 വരെയുള്ള കണക്കനുസരിച്ച് ഇവിടെ 1370 കേസുകളാണ് കെട്ടിക്കിടക്കുന്നത്.(Thiruvananthapuram has the highest number of pending POCSO cases in Kerala)
രണ്ടാമതുള്ള എറണാകുളവുമായി താരതമ്യം ചെയ്യുമ്പോൾ ഇത് ഇരട്ടിയോളമാണ്. എറണാകുളത്ത് 704 കേസുകളാണ് വിചാരണ കാത്തിരിക്കുന്നത്. ഏറ്റവും കുറവ് കേസുകളുള്ളത് പത്തനംതിട്ട (131), കാസർകോട് (232) എന്നീ ജില്ലകളിലാണ്. സംസ്ഥാനത്തുടനീളം ആകെ 6522 പോക്സോ കേസുകളുടെ വിചാരണ ഇനിയും തുടങ്ങിയിട്ടില്ല.
കുട്ടികൾക്കെതിരായ അതിക്രമങ്ങളിലും ബലാത്സംഗ കേസുകളിലും വേഗത്തിൽ നീതി ഉറപ്പാക്കാൻ സംസ്ഥാനത്താകെ 56 ഫാസ്റ്റ് ട്രാക്ക് കോടതികളുണ്ട്. ഇതിൽ 14 എണ്ണം പോക്സോ കേസുകൾക്ക് മാത്രമായി നീക്കിവെച്ചവയാണ്. തിരുവനന്തപുരത്ത് നഗരത്തിലും നെയ്യാറ്റിൻകര, ആറ്റിങ്ങൽ, വർക്കല, നെടുമങ്ങാട്, കാട്ടാക്കട എന്നിവിടങ്ങളിലും പോക്സോ കോടതികൾ പ്രവർത്തിക്കുന്നുണ്ട്.
തിരുവനന്തപുരം, എറണാകുളം, കോഴിക്കോട് എന്നിവിടങ്ങളിലെ അഡിഷണൽ ഡിസ്ട്രിക്റ്റ്, സെഷൻസ് കോടതികളിലും മറ്റ് ജില്ലകളിലെ ഫസ്റ്റ് അഡിഷണൽ ഡിസ്ട്രിക്റ്റ്, സെഷൻസ് കോടതികളിലും പോക്സോ കേസുകൾ പരിഗണിക്കാൻ സംവിധാനമുണ്ട്. പോക്സോ കേസുകൾ പരിഗണിക്കാൻ സംവിധാനങ്ങളുണ്ടായിട്ടും വിചാരണയ്ക്ക് പലപ്പോഴും തടസ്സങ്ങൾ നേരിടുന്നുണ്ട്.
ഫോറൻസിക് ലബോറട്ടറികളിലെ ജീവനക്കാരുടെ കുറവ് കാരണം നിർണ്ണായകമായ ഫോറൻസിക് റിപ്പോർട്ടുകൾ ലഭിക്കുന്നതിൽ വലിയ കാലതാമസമുണ്ടാകുന്നു. ഈ തടസ്സം നീക്കുന്നതിനായി സംസ്ഥാനത്തെ ഫോറൻസിക് സയൻസ് ലാബുകളിലേക്ക് പുതിയതായി 28 സയന്റിഫിക് ഓഫീസർ തസ്തികകൾ അനുവദിച്ചിട്ടുണ്ട്.