മലപ്പുറം: ഭാരതപ്പുഴയ്ക്ക് കുറുകെ താത്കാലിക പാലം നിർമ്മിക്കുന്നതുമായി ബന്ധപ്പെട്ട് നിലനിന്നിരുന്ന അനിശ്ചിതത്വം നീങ്ങി. ജില്ലാ കളക്ടറും കുംഭമേള സംഘാടകരും തമ്മിൽ നടത്തിയ ചർച്ചയെത്തുടർന്നാണ് നിർമ്മാണ പ്രവർത്തനങ്ങൾ പുനരാരംഭിക്കാൻ തീരുമാനമായത്. ഇതോടെ മേളയുടെ ഒരുക്കങ്ങൾ വീണ്ടും സജീവമായി.(Thirunavaya Kumbh Mela, Construction of temporary bridge resumes)
താത്കാലിക നിർമ്മാണങ്ങൾ പുഴയുടെ സ്വാഭാവിക ഒഴുക്കിനെയോ പരിസ്ഥിതിയെയോ ബാധിക്കില്ലെന്ന് ഉറപ്പുവരുത്താൻ കളക്ടർ നിർദ്ദേശിച്ചു. മേളയുമായി ബന്ധപ്പെട്ട് നടപ്പിലാക്കുന്ന സുരക്ഷാ ക്രമീകരണങ്ങളുടെയും നിർമ്മാണങ്ങളുടെയും വിശദമായ കർമ്മപദ്ധതി സമർപ്പിക്കാൻ സംഘാടകരോട് ആവശ്യപ്പെട്ടിട്ടുണ്ട്.
പരിസ്ഥിതി നിയമങ്ങൾ പാലിച്ചുകൊണ്ടുള്ള താത്കാലിക ക്രമീകരണങ്ങൾ മാത്രമേ അനുവദിക്കൂ എന്ന് റവന്യൂ അധികൃതർ വ്യക്തമാക്കി. നേരത്തെ, പുഴ കയ്യേറി പാലം നിർമ്മിക്കുന്നത് നദീതീര സംരക്ഷണ നിയമത്തിന്റെ ലംഘനമാണെന്ന് ചൂണ്ടിക്കാട്ടി റവന്യൂ വകുപ്പ് സ്റ്റോപ്പ് മെമ്മോ നൽകിയിരുന്നു. ജനുവരി 18 മുതൽ ഫെബ്രുവരി 3 വരെയാണ് തിരുനാവായ മഹാമാഘ മഹോത്സവം നടക്കുന്നത്.