വയനാട്: പറമ്പിൽ കോഴി കയറിയതിനെ ചൊല്ലിയുള്ള തർക്കത്തെ തുടർന്ന് വൃദ്ധദമ്പതികളെ ക്രൂരമായി ആക്രമിച്ച കേസിൽ അയൽവാസി അറസ്റ്റിൽ. കമ്പളക്കാട് പോലീസ് സ്റ്റേഷൻ പരിധിയിലെ പള്ളിക്കുന്ന് ചുണ്ടക്കര തെക്കേപീടികയിൽ ടി.കെ. തോമസ് (58) ആണ് പിടിയിലായത്. സംഭവം നടന്നശേഷം ഒളിവിലായിരുന്ന ഇയാളെ വെള്ളിയാഴ്ച രാവിലെ കൽപറ്റയിൽ നിന്നാണ് പോലീസ് പിടികൂടിയത്.(The suspect who brutally attacked an elderly couple with an iron rod has finally been arrested)
കഴിഞ്ഞ 24-ാം തീയതിയാണ് കേസിനാസ്പദമായ സംഭവം നടന്നത്. ലാൻസി തോമസ്, അമ്മിണി എന്നിവരുടെ വീട്ടിൽ അതിക്രമിച്ചു കയറിയ ടി.കെ. തോമസ് ഇരുമ്പ് വടി ഉപയോഗിച്ച് ഇവരെ മാരകമായി പരിക്കേൽപ്പിക്കുകയായിരുന്നു. ആദ്യം ലാൻസി തോമസിനെയാണ് പ്രതി ആക്രമിച്ചത്. ആക്രമണം കൈകൊണ്ട് തടഞ്ഞതിനെ തുടർന്ന് ഇദ്ദേഹത്തിന്റെ ഇരു കൈകളുടെയും എല്ലുകൾക്ക് പൊട്ടലുണ്ടായി.
ഭർത്താവിനെ ആക്രമിക്കുന്നത് തടയാൻ ശ്രമിച്ച അമ്മിണിയുടെ വലതു കൈയുടെ എല്ലും പൊട്ടി. കൂടാതെ, അമ്മിണിയുടെ തലയ്ക്കും കൈക്കും കാലിനും പരിക്കേറ്റിട്ടുണ്ട്. ഗുരുതരമായി പരിക്കേറ്റ ഇരുവരും നിലവിൽ ചികിത്സയിൽ തുടരുകയാണ്.
ടി.കെ. തോമസ് മറ്റൊരു കേസിൽ ഒരാളെ ഹെൽമെറ്റ് കൊണ്ട് അടിച്ച് പരിക്കേൽപ്പിച്ച കേസിലും പ്രതിയാണെന്ന് പോലീസ് അറിയിച്ചു. ഇൻസ്പെക്ടർ എസ്.എച്ച്.ഒ. എം.എ. സന്തോഷിന്റെ നേതൃത്വത്തിൽ എസ്.ഐ.മാരായ ജിഷ്ണു, റോയ്, എ.എസ്.ഐ.മാരായ ഇബ്രാഹിം, ദീപ, സിവിൽ പോലീസ് ഓഫീസർമാരായ ശിഹാബ്, സിറാജ്, നിഷാദ്, കൃഷ്ണദാസ് എന്നിവരടങ്ങിയ സംഘമാണ് പ്രതിയെ പിടികൂടിയത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.