ആലപ്പുഴ: കൈനകരിയിൽ ഗർഭിണിയായ യുവതിയെ കൊലപ്പെടുത്തി കായലിൽ തള്ളിയ കേസിലെ രണ്ടാം പ്രതിയുടെ ശിക്ഷ ഇന്ന് വിധിക്കും. നിലവിൽ ഒഡീഷയിലെ ജയിലിൽ കഴിയുന്ന പ്രതി രജനിയെ ഇന്ന് ആലപ്പുഴ ജില്ലാ സെഷൻസ് കോടതിയിൽ ഹാജരാക്കും.ഈ കേസിലെ ഒന്നാം പ്രതിയായ മലപ്പുറം നിലമ്പൂർ സ്വദേശി പ്രബീഷിന് തിങ്കളാഴ്ച കോടതി വധശിക്ഷ വിധിച്ചിരുന്നു.(The second accused in the case of killing a pregnant woman will be sentenced today)
രണ്ടാം പ്രതിയായ രജനി കുറ്റക്കാരിയാണെന്ന് കോടതി നേരത്തെ കണ്ടെത്തിയിരുന്നു. എന്നാൽ മയക്കുമരുന്ന് കേസിൽ ഒഡീഷ ജയിലിൽ കഴിയുകയായിരുന്നതിനാൽ ശിക്ഷാ വിധി നീളുകയായിരുന്നു. ഒന്നാം പ്രതിക്ക് ചുമത്തിയ എല്ലാ വകുപ്പുകളും രണ്ടാം പ്രതിയായ രജനിക്കും കോടതി ചുമത്തിയിട്ടുണ്ട്. രജനിക്കും വധശിക്ഷ നൽകണമെന്നാണ് പ്രോസിക്യൂഷൻ കോടതിയിൽ വാദിച്ചിട്ടുള്ളത്.
പുന്നപ്ര സ്വദേശിനിയായ അനിതയെ (2021 ജൂലൈ 9) കൊലപ്പെടുത്തിയ ശേഷം പൂക്കൈത ആറ്റിൽ മൃതദേഹം ഉപേക്ഷിച്ച നിലയിൽ തൊട്ടടുത്ത ദിവസമാണ് കണ്ടെത്തിയത്. വിവാഹിതനായ പ്രബീഷ്, വിവാഹിതരായ അനിതയുമായും കൈനകരിക്കാരിയായ രജനിയുമായും ഒരേ സമയം അടുപ്പത്തിലായിരുന്നു. അനിത ഗർഭിണിയായതോടെ പ്രബീഷ് ഒഴിവാക്കാൻ ശ്രമിച്ചു. ഇത് വിജയിക്കാതെ വന്നതോടെ രജനിയെ കൂട്ടുപിടിച്ച് കൊലപാതകം ആസൂത്രണം ചെയ്തു.
രജനിയുടെ വീട്ടിൽ വെച്ച് പ്രബീഷ് കഴുത്തിൽ കത്തിവെച്ച് അനിതയെ ഭീഷണിപ്പെടുത്തി. അനിതയുടെ നിലവിളി പുറത്തേക്ക് കേൾക്കാതിരിക്കാൻ രജനി വായും മൂക്കും അമർത്തിപ്പിടിക്കുകയും ചെയ്തു. ബോധരഹിതയായി അനിത മരിച്ചുവെന്ന് കരുതി ഇരുവരും ചേർന്ന് മൃതദേഹം പൂക്കൈത ആറ്റിൽ ഉപേക്ഷിക്കുകയായിരുന്നു. രണ്ടാം പ്രതിക്ക് ഇന്ന് ശിക്ഷ വിധിക്കുന്നതോടെ കേരളത്തിൽ ഏറെ കോളിളക്കം സൃഷ്ടിച്ച കേസിന്റെ വിചാരണാ നടപടികൾ പൂർത്തിയാകും.