കൊച്ചിയിൽ VK മിനിമോൾ മേയർ: അഭിനന്ദിച്ച് ദീപ്തി മേരി വർഗീസ്, തൃശൂരിൽ നിജി ജസ്റ്റിൻ, കണ്ണൂരിൽ പി ഇന്ദിര, പാലായിൽ 21കാരി ദിയ നഗരസഭ അധ്യക്ഷ, VV രാജേഷിന് ആശംസകൾ അറിയിച്ച് മുഖ്യമന്ത്രി പിണറായി വിജയൻ| Mayoral elections

തിരുവനന്തപുരം : സംസ്ഥാനത്തെ ആറ് കോർപ്പറേഷനുകളിലെയും 87 മുനിസിപ്പാലിറ്റികളിലെയും അധ്യക്ഷന്മാരെയും ഉപാധ്യക്ഷന്മാരെയും തിരഞ്ഞെടുക്കാനുള്ള നടപടികൾ ഇന്ന് നടക്കുകയാണ്. കൊച്ചി കോർപ്പറേഷൻ മേയറായി യുഡിഎഫിന്റെ വി.കെ. മിനിമോളെ തിരഞ്ഞെടുത്തു. അവർ സത്യപ്രതിജ്ഞ ചെയ്ത് ചുമതലയേറ്റു. വോട്ടെടുപ്പിന് പിന്നാലെ ദീപ്തി മേരി വർഗീസ് ഉൾപ്പെടെയുള്ള പ്രമുഖ നേതാക്കൾ മിനിമോളെ നേരിട്ടെത്തി അഭിനന്ദിച്ചു. യുഡിഎഫ് ധാരണപ്രകാരം ആദ്യ രണ്ടര വർഷമായിരിക്കും മിനിമോൾ മേയർ പദവി അലങ്കരിക്കുക. പാലായിൽ 21കാരി ദിയ നഗരസഭ അധ്യക്ഷ. രാവിലെ 10.30-ന് മേയർ / ചെയർപേഴ്സൺ തിരഞ്ഞെടുപ്പ് ആരംഭിച്ചു. ഉച്ചതിരിഞ്ഞ് 2.30-ന് ഡപ്യൂട്ടി മേയർ / വൈസ് ചെയർപേഴ്സൺ തിരഞ്ഞെടുപ്പും ആരംഭിക്കും.(The mayoral elections in the state have begun, Chief Minister Pinarayi Vijayan congratulates VV Rajesh)

തിരുവനന്തപുരം കോർപ്പറേഷന്റെ നിയുക്ത മേയറായി തിരഞ്ഞെടുക്കപ്പെട്ട വി.വി. രാജേഷിനെ മുഖ്യമന്ത്രി പിണറായി വിജയൻ അഭിനന്ദിച്ചു. തിരഞ്ഞെടുപ്പ് നടപടികൾ ആരംഭിച്ചതിന് പിന്നാലെ ഫോണിലൂടെയാണ് മുഖ്യമന്ത്രി തന്റെ ആശംസകൾ അറിയിച്ചത്. വോട്ടെടുപ്പിനായി കോർപ്പറേഷനിലെത്തിയ വി.വി. രാജേഷിന് ബിജെപി പ്രവർത്തകർ ആവേശകരമായ സ്വീകരണമാണ് നൽകിയത്. നിലവിൽ വോട്ടെടുപ്പ് നടപടികൾ പുരോഗമിക്കുന്നു.

പൗണ്ടുകടവിൽ നിന്ന് കോൺഗ്രസ് വിമതനായി ജയിച്ച സ്വതന്ത്രൻ സുധീഷ് കുമാർ വോട്ടെടുപ്പിൽ നിന്ന് വിട്ടുനിൽക്കുകയാണ്. ഒരു മുന്നണിയെയും പിന്തുണയ്ക്കില്ലെന്ന് അദ്ദേഹം വ്യക്തമാക്കി. എന്നാൽ മറ്റൊരു സ്വതന്ത്രനായ പാറ്റൂർ രാധാകൃഷ്ണൻ ബിജെപിക്ക് നേരത്തെ പിന്തുണ പ്രഖ്യാപിച്ചിട്ടുണ്ട്.

തിരഞ്ഞെടുപ്പിന് മുന്നോടിയായി വി.വി. രാജേഷ് തന്റെ വികസന കാഴ്ചപ്പാടുകൾ മാധ്യമങ്ങളോട് പങ്കുവെച്ചു. അടുത്ത അഞ്ച് വർഷത്തിനുള്ളിൽ തിരുവനന്തപുരത്തെ ഇന്ത്യയിലെ തന്നെ ഏറ്റവും മികച്ച മൂന്ന് നഗരങ്ങളിൽ ഒന്നാക്കി മാറ്റുകയാണ് തന്റെ പ്രധാന ലക്ഷ്യമെന്ന് അദ്ദേഹം പറഞ്ഞു. നഗര വികസന പ്രവർത്തനങ്ങൾക്കായി അടുത്ത 45 ദിവസത്തിനുള്ളിൽ പ്രധാനമന്ത്രി നരേന്ദ്ര മോദി തലസ്ഥാനത്ത് എത്തുമെന്ന് വി.വി. രാജേഷ് ഉറപ്പ് നൽകി.

ഭരണപക്ഷത്തെയും പ്രതിപക്ഷത്തെയും ഒന്നിച്ചു കൊണ്ടുപോകുമെന്നും, ശക്തമായ പ്രതിപക്ഷം ഉണ്ടാകുന്നത് ഭരണത്തിന്റെ ഗുണനിലവാരം വർദ്ധിപ്പിക്കുമെന്നും അദ്ദേഹം കൂട്ടിച്ചേർത്തു. ചരിത്രത്തിലാദ്യമായാണ് തിരുവനന്തപുരം നഗരസഭയുടെ ഭരണം ബിജെപി പിടിച്ചെടുക്കുന്നത്. നീണ്ട ചർച്ചകൾക്കൊടുവിൽ ഇന്നലെയാണ് വി.വി. രാജേഷിനെ മേയർ സ്ഥാനാർത്ഥിയായും ജി.എസ്. ആശാ നാഥിനെ ഡെപ്യൂട്ടി മേയർ സ്ഥാനാർത്ഥിയായും പ്രഖ്യാപിച്ചത്.

പ്രഖ്യാപന വേളയിൽ ആർ. ശ്രീലേഖ ഉൾപ്പെടെയുള്ള മുതിർന്ന നേതാക്കൾ സന്നിഹിതരായിരുന്നു. നിയുക്ത മേയർക്കും ഡെപ്യൂട്ടി മേയർക്കും മധുരം നൽകിയാണ് ശ്രീലേഖ തന്റെ സന്തോഷം പങ്കുവെച്ചത്. ബിജെപി സംസ്ഥാന സെക്രട്ടറിയും കൊടുങ്ങാനൂർ കൗൺസിലറുമായ വി.വി. രാജേഷ് ഇത് രണ്ടാം തവണയാണ് കൗൺസിലറായി തിരഞ്ഞെടുക്കപ്പെടുന്നത്.

തിരുവനന്തപുരം കോർപ്പറേഷനിൽ കക്ഷിനില ബിജെപി (50), എൽഡിഎഫ് (29), യുഡിഎഫ് (19), സ്വതന്ത്രർ (2) എന്നിങ്ങനെയാണ്. സ്വതന്ത്ര അംഗം എം. രാധാകൃഷ്ണന്റെ പിന്തുണ കൂടി ലഭിച്ചതോടെ 51 പേരുടെ പിന്തുണയോടെ വി.വി. രാജേഷ് നഗരപിതാവാകുമെന്ന് ഉറപ്പായി.