തൃശ്ശൂർ: പുലിക്കളി സംഘങ്ങൾക്കുള്ള കേന്ദ്ര ധനസഹായം വൈകാൻ കാരണം സംസ്ഥാന ടൂറിസം വകുപ്പിന്റെ അനാസ്ഥയാണെന്ന് കേന്ദ്രമന്ത്രി സുരേഷ് ഗോപി ആരോപിച്ചു. പുലിക്കളി സംഘങ്ങളുടെ ചെലവ് കണക്കുകൾ സംസ്ഥാന ടൂറിസം വകുപ്പ് കേന്ദ്രത്തിന് കൃത്യസമയത്ത് കൈമാറാതിരുന്നതാണ് ധനസഹായം ലഭിക്കാൻ വൈകിയതെന്ന് അദ്ദേഹം കുറ്റപ്പെടുത്തി.(The delay in funding for the Pulikali is due to the negligence of the Tourism Department, says Union Minister Suresh Gopi)
ഓരോ പുലിക്കളി സംഘത്തിനും മൂന്ന് ലക്ഷം രൂപയായിരുന്നു കേന്ദ്ര ധനസഹായമായി പ്രഖ്യാപിച്ചിരുന്നത്. സ്വന്തം ഇടപെടലിലൂടെയാണ് കേന്ദ്രത്തിൽ നിന്ന് ഈ തുക വാങ്ങി നൽകിയതെന്നും സുരേഷ് ഗോപി വിശദീകരിച്ചു. പുലിക്കളി സംഘങ്ങൾക്ക് തുക ലഭിക്കാത്തത് നേരത്തെ വലിയ വിവാദമായിരുന്നു.
കരുവന്നൂർ ബാങ്ക് തട്ടിപ്പോടെ സഹകരണമേഖലയിലെ അഴിമതി അവസാനിച്ചു എന്ന് ആരും കരുതേണ്ടെന്നും സുരേഷ് ഗോപി പറഞ്ഞു. "കലുങ്ക് സദസ്സിൽ വെച്ച് ചോദ്യം ഉന്നയിച്ച ആനന്ദവല്ലി ചേച്ചിയോട് താൻ മുഖ്യമന്ത്രിയോട് ചോദിക്കാൻ തന്നെയാണ് പറഞ്ഞത്. 300-ഓളം സഹകരണ ബാങ്കുകളിൽ ഇത്തരത്തിൽ അഴിമതികൾ നടക്കുന്നുണ്ട്. ജനങ്ങൾ ചർച്ച ചെയ്യേണ്ട വിഷയം ഇതൊക്കെയാണ്," സുരേഷ് ഗോപി പറഞ്ഞു.
കേന്ദ്രസർക്കാരിന്റെ പി.എം. ശ്രീ പദ്ധതിക്ക് എതിരെ ഉയരുന്ന വിമർശനങ്ങളോടും അദ്ദേഹം പ്രതികരിച്ചു. "കേരളത്തിൽ എത്ര സ്കൂളുകൾ തകർന്നു വീണു? കുട്ടികൾ അറിഞ്ഞിരിക്കേണ്ട ചരിത്രമാണ് പി.എം. ശ്രീയിൽ ഉൾപ്പെടുത്തുന്നത്. അങ്ങനെ പഠിപ്പിക്കുന്നത് കൊണ്ട് ആർക്കാണ് ഭയം?" എന്നും അദ്ദേഹം ചോദിച്ചു.