കൊച്ചി: സോണിയ ഗാന്ധിയും ഉണ്ണികൃഷ്ണൻ പോറ്റിയും ഒന്നിച്ചുള്ള ഫോട്ടോയെ ആസ്പദമാക്കി മുഖ്യമന്ത്രി പിണറായി വിജയൻ നടത്തിയ പരാമർശങ്ങൾക്കെതിരെ പ്രതിപക്ഷ നേതാവ് വി.ഡി. സതീശൻ. പിണറായി വിജയന്റേത് നിലവാരം കുറഞ്ഞ ആരോപണമാണെന്നും ശബരിമലയിലെ സ്വർണ്ണക്കൊള്ളയുമായി ബന്ധപ്പെട്ട യഥാർത്ഥ പ്രശ്നങ്ങളിൽ നിന്ന് ശ്രദ്ധ തിരിക്കാനാണ് സിപിഎം ഈ വിവാദം ഉയർത്തുന്നതെന്നും അദ്ദേഹം വാർത്താസമ്മേളനത്തിൽ പറഞ്ഞു.(The Chief Minister's accusation is cheap, VD Satheesan on Sonia Gandhi - Unnikrishnan potty photo controversy)
സോണിയ ഗാന്ധിയെ കാണുന്നതിന് ആർക്കും തടസ്സമില്ലെന്നും മുൻകൂട്ടി അനുവാദം വാങ്ങിയാൽ ആർക്കും അവരെ സന്ദർശിക്കാമെന്നും സതീശൻ പറഞ്ഞു. മുഖ്യമന്ത്രിയെ കാണുന്നതുപോലെ അത്ര പ്രയാസകരമായ കാര്യമല്ല അതെന്നും അദ്ദേഹം പരിഹസിച്ചു.
ശബരിമലയിൽ നിന്ന് സ്വർണ്ണം കവർന്ന സംഭവത്തിൽ രണ്ട് സിപിഎം നേതാക്കൾ ഇന്നും ജയിലിലാണ്. ഈ ഗൗരവകരമായ വിഷയം ചർച്ചയാകാതിരിക്കാനാണ് പഴയൊരു ചിത്രം മുൻനിർത്തി വിവാദമുണ്ടാക്കുന്നത്. മുഖ്യമന്ത്രിയും ഉണ്ണികൃഷ്ണൻ പോറ്റിയും ഒന്നിച്ചുള്ള ചിത്രങ്ങൾ പുറത്തുവന്നിട്ടുണ്ട്. അതുകൊണ്ട് മുഖ്യമന്ത്രി സ്വർണ്ണക്കൊള്ളയിൽ പങ്കാളിയാണെന്ന് കോൺഗ്രസ് പറഞ്ഞിട്ടില്ലെന്നും സതീശൻ ചൂണ്ടിക്കാട്ടി. മുഖ്യമന്ത്രി സ്വർണ്ണക്കൊള്ളയിലെ പ്രതികളെ സംരക്ഷിക്കുകയാണെന്നും അദ്ദേഹം ആരോപിച്ചു.