വയനാട്: കാസർഗോഡ് ബദിയടുക്കയിൽ യുവതിയെ കൊലപ്പെടുത്തിയ കേസിൽ ജാമ്യത്തിലിറങ്ങി മുങ്ങിയ പ്രതി പിടിയിൽ. മേപ്പാടി തൃക്കൈപ്പറ്റ സ്വദേശിയായ ആന്റോ സെബാസ്റ്റ്യനെ (41) വയനാട് പോലീസാണ് പിടികൂടിയത്. വയനാട് ജില്ലാ പോലീസ് മേധാവിയുടെ പ്രത്യേക സ്ക്വാഡ് വെള്ളിയാഴ്ച കാപ്പിസെറ്റ്, ഊട്ടിക്കവലയിൽ വെച്ചാണ് ഇയാളെ അറസ്റ്റ് ചെയ്തത്.(The absconding suspect of Kasaragod murder case has been found )
ആന്റണി എന്ന പേരിൽ പെരിക്കല്ലൂർ മൂന്ന്പാലത്ത് ഒരു വാടകവീട്ടിൽ പെയിന്റിങ്ങ് തൊഴിലാളിയായി ജോലി ചെയ്യുകയായിരുന്നു പ്രതി. കർണാടകയിൽ ഒളിവിലായിരുന്ന പ്രതി ഒരാഴ്ച മുമ്പാണ് എത്തിയത്. പ്രതിയെ പിടികൂടിയ ശേഷം വയനാട് പോലീസ് ബദിയടുക്ക പോലീസിന് കൈമാറി.
ബദിയഡുക്ക ഷേണി ഗ്രാമത്തിലെ മഞ്ഞാറയിൽ ടാപ്പിങ് തൊഴിലാളിയായിരുന്നു ആന്റോ സെബാസ്റ്റ്യൻ. കൂടെ താമസിച്ചിരുന്ന കൊല്ലം സ്വദേശിനി നീതു കൃഷ്ണയെയാണ് 2023 ജനുവരി 26-ന് ഇയാൾ കൊലപ്പെടുത്തിയത്.
കൊലപാതക ശേഷം നീതുവിന്റെ മൃതദേഹം തുണിയിൽ പൊതിഞ്ഞുവെച്ച ശേഷം ആന്റോ ദിവസങ്ങളോളം വീടിനുള്ളിൽ കഴിച്ചുകൂട്ടി. പിന്നീട് വാതിൽ പുറത്തുനിന്ന് പൂട്ടി മുങ്ങിയ ഇയാളെ അധികം വൈകാതെ പോലീസ് പിടികൂടിയിരുന്നു. ആറ് മാസത്തോളം ശിക്ഷയനുഭവിച്ച പ്രതി 2023 ജൂണിലാണ് കോടതിയിൽ നിന്ന് ജാമ്യത്തിലിറങ്ങിയത്. തുടർന്ന് ഇയാൾ ഒളിവിൽ പോവുകയായിരുന്നു.