തിരുവനന്തപുരം: കേരള കോൺഗ്രസ് (എം) ഇടതുമുന്നണി വിടുന്നു എന്ന അഭ്യൂഹങ്ങൾ ശക്തമാകുന്നതിനിടെ, നിർണ്ണായക നീക്കങ്ങളുമായി പാർട്ടി നേതൃത്വം. പുറമെ മുന്നണി മാറ്റം നിഷേധിക്കുമ്പോഴും അണിയറയിൽ ചർച്ചകൾ സജീവമാണെന്നാണ് സൂചന. വരാനിരിക്കുന്ന സ്റ്റിയറിങ് കമ്മിറ്റി യോഗത്തിൽ പാർട്ടി നിലപാട് സംബന്ധിച്ച് അന്തിമ തീരുമാനമുണ്ടാകും.(Talks in Kerala Congress M, Steering Committee meeting is crucial)
മുന്നണി മാറ്റം സംബന്ധിച്ച ചർച്ചകൾ പാർട്ടിയെ അസ്ഥിരപ്പെടുത്താനുള്ള അജണ്ടയുടെ ഭാഗമാണെന്ന് ജോസ് കെ. മാണി ഫേസ്ബുക്കിലൂടെ പ്രതികരിച്ചു. പാർട്ടി നിലപാട് ഇടതുമുന്നണിക്കൊപ്പമാണെന്ന് അദ്ദേഹം ആവർത്തിച്ചു.
ഇടതുമുന്നണിയിൽ ഉറച്ചുനിൽക്കുന്നു എന്ന സൂചന നൽകിക്കൊണ്ട് മുഖ്യമന്ത്രി പിണറായി വിജയനൊപ്പമുള്ള ചിത്രം റോഷി അഗസ്റ്റിൻ പങ്കുവെച്ചു. റോഷിയുമായി സിപിഎം നേതൃത്വം ആശയവിനിമയം നടത്തുന്നുണ്ടെങ്കിലും, ജോസ് കെ. മാണിയുടെ അന്തിമ നിലപാടിൽ സിപിഎമ്മിന് ആശങ്കയുണ്ട്.
മറ്റന്നാൾ ചേരുന്ന സ്റ്റിയറിങ് കമ്മിറ്റി യോഗം പാർട്ടിയുടെ ഭാവി തീരുമാനിക്കുന്നതിൽ നിർണ്ണായകമാകും. മുന്നണി മാറ്റത്തെ അനുകൂലിക്കുന്നവരും എതിർക്കുന്നവരും തമ്മിലുള്ള ചർച്ചകൾ യോഗത്തിൽ നടക്കും.