തിരുവനന്തപുരം: യൂത്ത് കോൺഗ്രസ് നേതാവ് രാഹുൽ മാങ്കൂട്ടത്തിൽ എം.എൽ.എയ്ക്കെതിരെ പരാതി നൽകിയ യുവതിയെ സാമൂഹിക മാധ്യമങ്ങളിലൂടെ അപമാനിച്ച കേസിൽ ആക്ടിവിസ്റ്റ് രാഹുൽ ഈശ്വർ അറസ്റ്റിൽ. തിരുവനന്തപുരം സൈബർ പോലീസ് വീട്ടിൽ നിന്ന് കസ്റ്റഡിയിലെടുത്ത് ചോദ്യം ചെയ്തതിന് പിന്നാലെയാണ് അറസ്റ്റ് രേഖപ്പെടുത്തിയത്.
ജാമ്യമില്ലാ വകുപ്പുകൾ പ്രകാരമാണ് തിരുവനന്തപുരം സൈബർ പോലീസ് കേസെടുത്തിരിക്കുന്നത്. ഈ കേസിൽ അഞ്ചാം പ്രതിയാണ് രാഹുൽ ഈശ്വർ. രാഹുലിൻ്റെ ലാപ്ടോപ്പ് ഉൾപ്പെടെയുള്ള ഇലക്ട്രോണിക് ഉപകരണങ്ങളും പോലീസ് പിടിച്ചെടുത്തിട്ടുണ്ട്. തിങ്കളാഴ്ച രാഹുൽ ഈശ്വറിനെ കോടതിയിൽ ഹാജരാക്കും.
യുവതിയുടെ പരാതിയിൽ രാഹുൽ ഈശ്വറിനു പുറമേ, കെ.പി.സി.സി. ജനറൽ സെക്രട്ടറി സന്ദീപ് വാര്യർ (നാലാം പ്രതി), മഹിളാ കോൺഗ്രസ് പത്തനംതിട്ട ജില്ലാ ജനറൽ സെക്രട്ടറി രഞ്ജിത പൂളിക്കൻ (ഒന്നാം പ്രതി), അഭിഭാഷകയായ ദീപാ ജോസഫ് എന്നിവർ ഉൾപ്പെടെയുള്ളവർക്കെതിരെയാണ് കേസെടുത്തിരിക്കുന്നത്.
അതിജീവിതയെ തിരിച്ചറിയുന്ന വിധത്തിൽ പരാമർശം നടത്തി, സ്ത്രീത്വത്തെ അപമാനിച്ചു എന്നീ വകുപ്പുകൾ ഉൾപ്പെടുത്തിയും ഐ.ടി. നിയമത്തിലെ വകുപ്പുകൾ ചേർത്തും ആണ് കേസ് രജിസ്റ്റർ ചെയ്തിട്ടുള്ളത്.
സാമൂഹിക മാധ്യമങ്ങൾ വഴി പരാതിക്കാരിക്ക് നേരെ അധിക്ഷേപം തുടരുന്ന സാഹചര്യത്തിൽ, അതാത് ജില്ലകളിൽ കേസ് രജിസ്റ്റർ ചെയ്യാൻ ക്രമസമാധാന വിഭാഗം എ.ഡി.ജി.പി. നേരത്തെ നിർദ്ദേശം നൽകിയിരുന്നു.