പ്രമുഖ വിനോദസഞ്ചാര കേന്ദ്രങ്ങളിലൊന്നായ വട്ടവടയെ സമ്പൂർണ്ണ മാലിന്യമുക്തമാക്കുക എന്ന ലക്ഷ്യത്തോടെ "സുന്ദര വട്ടവട" കാമ്പയിന് തുടക്കമായി. ഹരിത കേരളം മിഷന്റെയും വട്ടവട ഗ്രാമപഞ്ചായത്തിന്റെയും സംയുക്താഭിമുഖ്യത്തിലാണ് കാമ്പയിൻ ആരംഭിച്ചിരിക്കുന്നത്. വട്ടവടയെ മാലിന്യരഹിതമാക്കി കൂടുതൽ സഞ്ചാരികളെ ആകർഷിക്കുന്നതിലൂടെ പ്രാദേശിക ജനങ്ങളുടെ വരുമാനം വർദ്ധിപ്പിക്കുന്നതും കാമ്പയിന്റെ പ്രധാന ലക്ഷ്യമാണ്.
കാമ്പയിന്റെ ആദ്യഘട്ടത്തിൽ, മാലിന്യം തരംതിരിക്കുന്നതിന്റെ പ്രാധാന്യം, യൂസർ ഫീ കൃത്യമായി കൈമാറേണ്ടതിന്റെ ആവശ്യകത, മാലിന്യം പൊതുസ്ഥലങ്ങളിൽ വലിച്ചെറിയുന്നത് തടയേണ്ടതിന്റെ പ്രാധാന്യം തുടങ്ങിയ വിഷയങ്ങളിൽ ബോധവൽക്കരണം സൃഷ്ടിക്കുന്നതിനായി വീടുകൾ കയറിയുള്ള പ്രചാരണ പരിപാടികൾക്ക് തുടക്കം കുറിച്ചു. തൊടുപുഴ അൽ അസ്ഹർ കോളേജിലെ സോഷ്യൽ വർക്ക് വിഭാഗം വിദ്യാർത്ഥികളുടെ സഹകരണത്തോടെയാണ് ബോധവൽക്കരണ പ്രവർത്തനങ്ങൾ ആരംഭിച്ചിരിക്കുന്നത്.
മാലിന്യം കൈകാര്യം ചെയ്യുന്നതിൽ വട്ടവട നേരിടുന്ന വെല്ലുവിളികളെ അതിജീവിക്കാനും ഒരു മാതൃകാപരമായ മാലിന്യ സംസ്കരണ സംവിധാനം ഒരുക്കാനും കാമ്പയിൻ സഹായകമാകുമെന്നാണ് പ്രതീക്ഷിക്കുന്നത്. വട്ടവടയുടെ പ്രകൃതി സൗന്ദര്യം നിലനിർത്തുന്നതിനും ശുചിത്വമുള്ള ഒരു സമൂഹത്തെ കെട്ടിപ്പടുക്കുന്നതിനും കാമ്പയിൻ നിർണായക പങ്ക് വഹിക്കും.
കാമ്പയിനുമായി ബന്ധപ്പെട്ട് ഗ്രാമപഞ്ചായത്ത് അസിസ്റ്റൻറ് സെക്രട്ടറി പ്രതീഷ് പി.ജെ, ഹരിത കേരളം മിഷൻ പ്രോജക്ട് അസോസിയേറ്റ് ജിഷ്ണു, ഹരിത കേരളം മിഷൻ ആർ.പി. രാകേഷ് എന്നിവർ വിദ്യാർത്ഥികൾക്ക് പരിശീലനം നൽകി. പ്രാദേശിക ഭരണകൂടവും പൊതുജനങ്ങളും ഒറ്റക്കെട്ടായി പ്രവർത്തിച്ചാൽ വട്ടവടയെ സമ്പൂർണ്ണ മാലിന്യമുക്തമാക്കുക എന്ന ലക്ഷ്യം കൈവരിക്കാൻ സാധിക്കുമെന്നും ഗ്രാമപഞ്ചായത്ത് അധികൃതർ പറഞ്ഞു.