കോഴിക്കോട്: വിനോദസഞ്ചാര മേഖലയ്ക്ക് പുത്തൻ ഉണർവ് നൽകിക്കൊണ്ട് കോഴിക്കോട് ബീച്ചിനെയും ബേപ്പൂരിനെയും ബന്ധിപ്പിച്ചുള്ള സ്പീഡ് ബോട്ട് സർവീസ് പ്രവർത്തനമാരംഭിച്ചു. ടൂറിസം-പൊതുമരാമത്ത് വകുപ്പ് മന്ത്രി പി.എ. മുഹമ്മദ് റിയാസ് സർവീസിന്റെ ഉദ്ഘാടനം നിർവ്വഹിച്ചു. മലബാറിന്റെ കടൽ ടൂറിസം സാധ്യതകൾ പരമാവധി പ്രയോജനപ്പെടുത്തുന്നതിന്റെ ഭാഗമായാണ് ഈ പുതിയ പദ്ധതിക്ക് തുടക്കമിട്ടിരിക്കുന്നത്.(Speed boat service has started in Kozhikode - Beypore route)
കോഴിക്കോട്-ബേപ്പൂർ റൂട്ടിൽ ആദ്യമായാണ് ഇത്തരമൊരു ബോട്ട് സർവീസ് സജ്ജമാകുന്നത്. റോഡ് മാർഗമുള്ള ഗതാഗതക്കുരുക്കിൽപ്പെടാതെ വെറും 15 മിനിറ്റ് കൊണ്ട് യാത്രക്കാർക്ക് കോഴിക്കോട് ബീച്ചിൽ നിന്ന് ബേപ്പൂരിലെത്താം. ഒരു ബോട്ടിൽ ഒരേസമയം 13 പേർക്ക് യാത്ര ചെയ്യാം.
സഞ്ചാരികൾക്കായി അത്യാധുനിക സുരക്ഷാ സംവിധാനങ്ങൾ ബോട്ടിൽ ഒരുക്കിയിട്ടുണ്ട്. വിനോദസഞ്ചാരികളുടെ താല്പര്യമനുസരിച്ച് തിരഞ്ഞെടുക്കാവുന്ന വ്യത്യസ്ത യാത്രാ പാക്കേജുകൾ ലഭ്യമാണ്.