പാലക്കാട്: ലൈംഗിക പീഡന കേസിൽ ഒളിവിലുള്ള രാഹുൽ മാങ്കൂട്ടത്തിൽ എം.എൽ.എയെ ഉടൻ അറസ്റ്റ് ചെയ്യാനുള്ള നിർണായക നീക്കങ്ങളുമായി പ്രത്യേക അന്വേഷണ സംഘം മുന്നോട്ട്. രാഹുലിന്റെ പാലക്കാട് കുന്നത്തൂർ മേട്ടിലുള്ള ഫ്ലാറ്റിൽ എസ്.ഐ.ടി. സംഘം വീണ്ടും വിശദമായ പരിശോധന നടത്തി.(Special Investigation team again at Rahul Mamkootathil's flat, Inspection)
രാവിലെ ഫ്ലാറ്റിൽ പ്രാഥമിക പരിശോധന പൂർത്തിയാക്കി ക്രൈംബ്രാഞ്ച് ആസ്ഥാനത്തെത്തിയ സംഘം ജില്ലാ പോലീസ് ഉദ്യോഗസ്ഥരുമായി കൂടിക്കാഴ്ച നടത്തിയിരുന്നു. ഇതിനുശേഷം സ്വകാര്യ വാഹനത്തിൽ അഞ്ചംഗ സംഘം വീണ്ടും ഫ്ലാറ്റിലെത്തി വിശദമായ പരിശോധന നടത്തി.
ഫ്ലാറ്റിലെ സി.സി.ടി.വി. ദൃശ്യങ്ങൾ ഉൾപ്പെടെയുള്ള നിർണായക തെളിവുകൾ പോലീസ് ശേഖരിച്ചു. യുവതി നൽകിയ വിവരങ്ങൾ പ്രകാരമാണ് പോലീസ് സി.സി.ടി.വി. ദൃശ്യങ്ങൾ പരിശോധിച്ചത്. രാഹുലിന്റെ പേഴ്‌സണൽ അസിസ്റ്റന്റുമാരിൽ നിന്നും അന്വേഷണ സംഘം മൊഴിയെടുക്കുന്നുണ്ട്. മുൻകൂർ ജാമ്യഹർജി പരിഗണിക്കുന്നതിന് മുമ്പായി രാഹുൽ മാങ്കൂട്ടത്തിലിനെ അറസ്റ്റ് ചെയ്യാനാണ് പോലീസ് ശ്രമിക്കുന്നത്. മുൻകൂർ ജാമ്യാപേക്ഷ സമർപ്പിച്ചത് അറസ്റ്റിന് തടസ്സമല്ലെന്ന് പോലീസ് വൃത്തങ്ങൾ വ്യക്തമാക്കി.
രാഹുൽ മാങ്കൂട്ടത്തിലിനെതിരായ പീഡന കേസിൽ പരാതിക്കാരിയ്ക്കെതിരെ സമൂഹമാധ്യമങ്ങളിലൂടെ വ്യാപകമായ സൈബർ ആക്രമണം നടത്തിയവർക്കെതിരെ സൈബർ പോലീസ് കേസെടുത്തു. അതിജീവിത നൽകിയ പരാതിയുടെ അടിസ്ഥാനത്തിലാണ് കേസ്. സൈബർ ആക്രമണവുമായി ബന്ധപ്പെട്ട് യുവതി നൽകിയ പരാതിയിൽ ഓരോ ജില്ലകളിലും കേസെടുക്കാനാണ് എ.ഡി.ജി.പി. എച്ച്. വെങ്കിടേഷിന്റെ നിർദ്ദേശം. സൈബർ ആക്രമണത്തിൽ അറസ്റ്റുണ്ടാകുമെന്നും കർശന നടപടിയുണ്ടാകുമെന്നും എ.ഡി.ജി.പി. അറിയിച്ചു.
കോൺഗ്രസ് നേതാവ് സന്ദീപ് വാര്യരുടെ ഫേസ്ബുക്ക് പോസ്റ്റിലെ ചിത്രം ഉപയോഗിച്ചാണ് രാഹുൽ അനുകൂലികൾ ഉൾപ്പെടെയുള്ള കോൺഗ്രസ് അനുകൂല പേജുകൾ അതിജീവിതയ്ക്കെതിരെ കടുത്ത അധിക്ഷേപം നടത്തുന്നത്. പരാതിക്കാരിയായ യുവതിക്കെതിരെ നടക്കുന്ന സൈബർ ആക്രമണം പാർട്ടിയുടെ അറിവോടെയല്ലെന്ന് കോൺഗ്രസ് വ്യക്തമാക്കി.