കൊച്ചി: 2025-26 സാമ്പത്തിക വർഷത്തെ രണ്ടാം പാദത്തിൽ 351.36 കോടി രൂപയുടെ റെക്കോഡ് അറ്റാദായം രേഖപ്പെടുത്തി സൗത്ത് ഇന്ത്യൻ ബാങ്ക്. മുൻ വർഷത്തെ സമാന പാദത്തെ അപേക്ഷിച്ച്‌ 8 ശതമാനമാണ് വർധനവ്. മുൻവർഷം ഇത് 324.69 കോടി രൂപയായിരുന്നു. ബാങ്കിന്റെ മൊത്ത നിഷ്ക്രിയ ആസ്തികള്‍ മുന്‍ വര്‍ഷത്തെ 4.40 ശതമാനത്തില്‍ നിന്നും 147 പോയിന്റുകൾ കുറച്ച് 2.93 ശതമാനമാനത്തിലെത്തിച്ചു. അറ്റ നിഷ്ക്രിയ ആസ്തി 75 പോയിന്റുകൾ കുറച്ച് 1.31 ശതമാനത്തില്‍ നിന്നും 0.56 ശതമാനമാനത്തിലെത്തിക്കാനും ബാങ്കിനു കഴിഞ്ഞു. പലിശ ഇതര വരുമാനം 26 ശതമാനം വാർഷിക വളർച്ചയോടെ 515.73 കോടി രൂപയിലെത്തി. എഴുതിത്തള്ളലിനു പുറമെയുള്ള കിട്ടാകടങ്ങളുടെ നീക്കിയിരുപ്പ് അനുപാതം 1005 പോയിന്റുകൾ വർധിച്ച് 81.29 ശതമാനവും, എഴുതിത്തള്ളൽ ഉൾപ്പെടുത്തിയുള്ള കിട്ടാകടങ്ങളുടെ നീക്കിയിരുപ്പ് അനുപാതം 952 പോയിന്റുകൾ വർധിച്ച് 90.25 ശതമാനവുമായി. ആസ്തി വരുമാന അനുപാതത്തിൽ 1 ശതമാനത്തിന് മുകളിലുള്ള വളർച്ചയാണുള്ളത്. പുതിയ നിഷ്ക്രിയ ആസ്തികളുടെ നിരക്കിനെ സൂചിപ്പിക്കുന്ന സ്ലിപ്പേജ് അനുപാതം 15 പോയിന്റുകൾ കുറച്ച് 0.21 ശതമാനത്തിലെത്തിക്കാനും കഴിഞ്ഞു.
റീട്ടെയ്ല്‍ നിക്ഷേപങ്ങള്‍ 11 ശതമാനം വളർച്ചയോടെ 1,12,625 കോടി രൂപയിലെത്തി. പ്രവാസി (എൻ.ആർ.ഐ) നിക്ഷേപം 9 ശതമാനം വര്‍ധിച്ച് 33,195 കോടി രൂപയിലെത്തി. മുന്‍ വര്‍ഷം ഈ കാലയളവിൽ 30,488 കോടി രൂപയായിരുന്നു. കാസ (CASA) നിക്ഷേപം 10 ശതമാനം വാർഷിക വളർച്ച നേടി (കറണ്ട് അക്കൗണ്ട് 11%, സേവിങ്സ് അക്കൗണ്ട് 10%).
മൊത്ത വായ്പാ വിതരണം 9 ശതമാനം വളര്‍ച്ച കൈവരിച്ച്‌ 84,714 കോടി രൂപയിൽ നിന്നും 92,286 കോടി രൂപയായി. കോർപറേറ്റ് വിഭാഗം 9 ശതമാനം വാർഷിക വളർച്ചയോടെ 33,961 കോടി രൂപയിൽ നിന്നും 37,008 കോടി രൂപയിലെത്തി. എ അല്ലെങ്കിൽ അതിനു മുകളിൽ റേറ്റിംഗ് ഉള്ള കോർപ്പറേറ്റ് വായ്പാ വിതരണം 3,825 കോടി രൂപ വർദ്ധിച്ച് 20,679 കോടിയിൽനിന്നും 24,503 കോടി രൂപയിലെത്തി. ബിസിനസ് വായ്പകൾ 4 ശതമാനം വളർച്ചയോടെ 13,424 കോടി രൂപയായി. സ്വർണ വായ്പകൾ 16,609 കോടി രൂപയിൽ നിന്ന് 18,845 കോടി രൂപയായി. 13 ശതമാനമാണ് വാർഷിക വളർച്ച. ഭവനവായ്പ 25 ശതമാനം വാർഷിക വളർച്ചയോടെ 8,849 കോടി രൂപയിലെത്തി. വാഹന വായ്പ 25 ശതമാനം വാർഷിക വളർച്ചയോടെ 2,288 കോടി രൂപയിലെത്തി.
"സൗത്ത് ഇന്ത്യൻ ബാങ്ക് പിന്തുടരുന്ന കൃത്യമായ നയങ്ങളുടെ തുടർച്ചയായി, ശക്തമായ ബിസിനസ് പ്രകടനമാണ് ഇക്കാലയളവിൽ കാഴ്ചവെച്ചത്. കോർപറേറ്റ് വായ്പ, എംഎസ്എംഇ, ഭവന വായ്പ, വാഹന വായ്പ, സ്വർണ വായ്പ തുടങ്ങി എല്ലാ വിഭാഗങ്ങളിലും ആസ്തി ഗുണമേന്മയിൽ ശ്രദ്ധകേന്ദ്രീകരിച്ചുള്ള വളർച്ച കൈവരിക്കാൻ കഴിഞ്ഞു. ഗുണമേന്മയുള്ള വായ്പാ വളർച്ചയിലൂടെ ലാഭക്ഷമത ഉറപ്പാക്കുക എന്ന തന്ത്രപ്രധാന ലക്ഷ്യത്തിലൂടെ നഷ്ടസാധ്യത കുറഞ്ഞ പുതിയ വായ്പകൾ വിതരണം ചെയ്യാനും കഴിഞ്ഞു. സുസ്ഥിര വളർച്ച, വിവേകപൂർണമായ റിസ്ക് മാനേജ്‌മന്റ്, മുഴുവൻ ഓഹരി ഉടമകൾക്കുമുള്ള സാമ്പത്തിക നേട്ടം എന്നിവയിലുള്ള ബാങ്കിന്റെ തുടർച്ചയായ പ്രതിബദ്ധതയാണ് ഈ സമീപനം പ്രതിഫലിപ്പിക്കുന്നത്."- സൗത്ത് ഇന്ത്യൻ ബാങ്ക് എംഡിയും സിഇഒയുമായ പി ആർ ശേഷാദ്രി പറഞ്ഞു. 2025 സെപ്റ്റംബറിലെ കണക്കുകൾപ്രകാരം മൂലധന പര്യാപ്തത അനുപാതം 17.70 ശതമാനത്തിൽ തുടരുന്നത്, ബാങ്കിന്റെ ശക്തമായ മൂലധന ശേഷിക്ക് പുറമെ മികച്ച മൂലധന മാനേജ്മെൻ്റ് രീതികളെയും ഭാവി ബിസിനസ് വളർച്ചയ്ക്കുള്ള കഴിവിനേയും അടിവരയിടുന്നു.
ബാങ്കിന്റെ പൂർണ ഉടമസ്ഥതയിലുള്ള എസ്ഐബിഒഎസ്എല്ലിന്റെ സാമ്പത്തിക ഫലങ്ങൾ കൂടി ഉൾപ്പെട്ടതാണ് ബാങ്കിന്റെ ഈ സാമ്പത്തിക ഫലങ്ങൾ.