കണ്ണൂർ: അടുത്തിടെ കേന്ദ്ര ആഭ്യന്തരമന്ത്രി അമിത് ഷാ കേരളത്തിൽ നടത്തിയ പ്രസ്താവനകൾ കേരളീയ സമൂഹം അതീവ ഗൗരവത്തോടെ കാണണമെന്ന് മുഖ്യമന്ത്രി പിണറായി വിജയൻ. ഇത് സി.പി.എമ്മോ എൽ.ഡി.എഫോ മാത്രം ശ്രദ്ധിക്കേണ്ട കാര്യമല്ലെന്നും, കേരളത്തിന്റെ തനിമയും മതേതരത്വവും സംരക്ഷിക്കാൻ സമൂഹം ഒറ്റക്കെട്ടായി രംഗത്തിറങ്ങണമെന്നും മുഖ്യമന്ത്രി ആവശ്യപ്പെട്ടു. കണ്ണൂരിൽ അഴീക്കോടൻ സ്മാരക മന്ദിരം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
'ഓണവും മഹാബലിയും നഷ്ടമാകും'
ആർ.എസ്.എസ്. പ്രതിനിധാനം ചെയ്യുന്ന പ്രത്യയശാസ്ത്രം മേധാവിത്വം നേടിയാൽ കേരളീയ സമൂഹത്തിന് നിലനിൽക്കാനാകില്ലെന്ന് മുഖ്യമന്ത്രി ചൂണ്ടിക്കാട്ടി. വ്യക്തിയുടെ ഇഷ്ടവസ്ത്രം, ആരാധനാലയം, ഭക്ഷണ സ്വാതന്ത്ര്യം തുടങ്ങിയവയെല്ലാം നിലനിൽക്കുന്നത് ആർ.എസ്.എസ്സിന് മേധാവിത്വം കിട്ടാത്തതുകൊണ്ടാണ്. സംഘപരിവാർ മേധാവിത്വമുള്ളിടത്ത് അടുക്കളയിലെ ഭക്ഷണം വരെ പരിശോധിച്ച് ആളുകളെ ആക്രമിക്കുന്ന സ്ഥിതിയുണ്ടെന്നും അദ്ദേഹം പറഞ്ഞു.
"ഓണത്തിന് മഹാബലിയെ നാം ഓർക്കുന്നു. എന്നാൽ ആർ.എസ്.എസ്സിന് അതിനോട് യോജിപ്പില്ല. വാമനനെയാണ് ഓർക്കേണ്ടത് എന്നാണ് അവർ പറയുന്നത്. ആർ.എസ്.എസ്സിന് മേധാവിത്വം കിട്ടിയാൽ ഓണവും മഹാബലിയും നഷ്ടപ്പെടുന്ന സ്ഥിതിയുണ്ടാകും."- മുഖ്യമന്ത്രി കൂട്ടിച്ചേർത്തു.
ശബരിമലയും ന്യൂനപക്ഷ വിരുദ്ധതയും
ശബരിമലയിലെ ഐതിഹ്യങ്ങളെ പോലും സംഘപരിവാർ തങ്ങളുടെ സങ്കുചിത ചിന്തകൾക്ക് അനുസരിച്ച് മാറ്റിയെഴുതാൻ ശ്രമിക്കുന്നതായി മുഖ്യമന്ത്രി ആരോപിച്ചു. ശബരിമല ഐതിഹ്യത്തിൽ അയ്യപ്പനോടൊപ്പം വാവർക്കും പ്രധാന സ്ഥാനമുണ്ട്. ഇത് അംഗീകരിക്കാനാകാത്തതുകൊണ്ടാണ് വാവരുടെ പേര് മാറ്റാനും ഇകഴ്ത്തി കാണിക്കാനും അവർ ശ്രമിക്കുന്നത്. സംഘപരിവാർ മേധാവിത്വം നേടിയാൽ ന്യൂനപക്ഷങ്ങളെ അവർ അംഗീകരിക്കില്ലെന്നും ജാതി-മത വിദ്വേഷമുള്ള നാടായി കേരളം മാറുമെന്നും മുഖ്യമന്ത്രി മുന്നറിയിപ്പ് നൽകി.
അമിത് ഷായുടെ പ്രസ്താവന ഗൗരവതരം
അമിത് ഷായുടെ പ്രസ്താവനകൾ കേരളം ജാഗ്രതയോടെ കാണണം. തദ്ദേശ തിരഞ്ഞെടുപ്പിൽ 25 ശതമാനം വോട്ട് ബി.ജെ.പി. നേടുമെന്നും പിന്നാലെ വരുന്ന നിയമസഭാ തിരഞ്ഞെടുപ്പിൽ ഭൂരിപക്ഷം നേടുമെന്നും അമിത് ഷാ പറഞ്ഞത് നിസ്സാരമായി കാണരുത്.
"അമിത് ഷാ പറയുന്നത് പോലെ ബി.ജെ.പിക്ക് നൽകുന്ന ഓരോ വോട്ടും കേരളത്തിന്റെ തനിമയെ തകർക്കാനാണ് ഇടവരുത്തുക എന്നത് തിരിച്ചറിയണം. അത് മനസ്സിലാക്കി സമൂഹം നിലപാട് സ്വീകരിക്കേണ്ടതുണ്ട്."
'റിയൽ കേരള സ്റ്റോറി' തിരിച്ചറിഞ്ഞ അഖിലേന്ത്യാ നേതാവ്
അമിത് ഷായ്ക്ക് താൽപര്യമുള്ള ഒരു സംഘടനയുടെ മുൻനിര അഖിലേന്ത്യാ നേതാവ് കേരളം സന്ദർശിച്ച അനുഭവം മുഖ്യമന്ത്രി പങ്കുവെച്ചു. പട്ടണങ്ങൾക്ക് പുറമെ ഗ്രാമങ്ങൾ സന്ദർശിച്ച അദ്ദേഹം, മാലിന്യമില്ലാത്തതും എല്ലാവരും വസ്ത്രം ധരിച്ച് നടക്കുന്നതുമായ കേരളത്തിന്റെ അവസ്ഥ കണ്ട് അത്ഭുതപ്പെട്ടു. അനുഭവത്തിലൂടെ 'റിയൽ കേരള സ്റ്റോറി' തിരിച്ചറിഞ്ഞ അദ്ദേഹം വീണ്ടും വരുമെന്ന് അറിയിച്ചു. "ഈ കേരളം ഈ നിലയ്ക്ക് നിൽക്കണോ എന്നതാണ് പ്രശ്‌നം," മുഖ്യമന്ത്രി പ്രസംഗം ഉപസംഹരിച്ചു.