ആലപ്പുഴ: കേരള രാഷ്ട്രീയത്തിൽ ഏറെ ചർച്ചയാകുന്ന എസ്എൻഡിപി - എൻഎസ്എസ് ഐക്യനീക്കത്തിന് എസ്എൻഡിപി യോഗം കൗൺസിലിന്റെ ഔദ്യോഗിക അംഗീകാരം. ഇതുമായി ബന്ധപ്പെട്ട തുടർചർച്ചകൾക്കായി തുഷാർ വെള്ളാപ്പള്ളിയെ കൗൺസിൽ ചുമതലപ്പെടുത്തി. എൻഎസ്എസ് ജനറൽ സെക്രട്ടറി ജി. സുകുമാരൻ നായരുമായുള്ള കൂടിക്കാഴ്ച ഉടൻ ഉണ്ടാകുമെന്ന് ആലപ്പുഴയിൽ ചേർന്ന നിർണ്ണായക യോഗത്തിന് ശേഷം എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ (Vellappally Natesan) അറിയിച്ചു. നായാടി മുതൽ നസ്രാണി വരെയുള്ളവരുടെ ഐക്യം അനിവാര്യമാണെന്ന പ്രമേയവും യോഗം അംഗീകരിച്ചു.
ന്യൂനപക്ഷങ്ങൾ മതത്തെ സംഘശക്തിയായി ഉപയോഗിക്കുമ്പോൾ ഭൂരിപക്ഷ സമുദായങ്ങളും ഒന്നിക്കേണ്ടത് കാലഘട്ടത്തിന്റെ ആവശ്യമാണെന്ന് വെള്ളാപ്പള്ളി പറഞ്ഞു. മലപ്പുറം ഉൾപ്പെടെയുള്ള ജില്ലകളിൽ യഥാർത്ഥ മതേതരത്വം ഉറപ്പാക്കണം. കപട മതേതരത്വം പറയുന്ന നേതാക്കൾ തന്നെ അധിക്ഷേപിക്കുകയാണെന്നും അദ്ദേഹം കുറ്റപ്പെടുത്തി. മുസ്ലിം ലീഗ് ഒഴികെയുള്ള മറ്റ് മുസ്ലിം സംഘടനകളുമായി ചർച്ച നടത്താൻ തയ്യാറാണെന്നും ജമാഅത്തെ ഇസ്ലാമി ഉൾപ്പെടെയുള്ളവരുമായി സംസാരിക്കുമെന്നും വെള്ളാപ്പള്ളി വ്യക്തമാക്കി.
ഭരണഘടനാ വിരുദ്ധ പ്രസംഗത്തിന്റെ പേരിൽ മന്ത്രി സജി ചെറിയാൻ ഖേദം പ്രകടിപ്പിച്ചത് തെറ്റാണെന്നും വെള്ളാപ്പള്ളി അഭിപ്രായപ്പെട്ടു. സത്യം പറഞ്ഞതിന് എന്തിനാണ് ഖേദം പ്രകടിപ്പിക്കുന്നത്? വോട്ട് മുന്നിൽ കണ്ടാണ് സജി ചെറിയാൻ ഖേദം പ്രകടിപ്പിച്ചത്. ഹിന്ദു സമൂഹത്തെയും ക്രിസ്ത്യൻ സമൂഹത്തെയും ഒപ്പം നിർത്താനുള്ള രാഷ്ട്രീയ തന്ത്രം മാത്രമാണ് ഈ ഖേദപ്രകടനമെന്നും വെള്ളാപ്പള്ളി നടേശൻ പരിഹസിച്ചു. സമുദായ ഐക്യത്തിലൂടെ രാഷ്ട്രീയ ശക്തി തെളിയിക്കാനാണ് എസ്എൻഡിപി ലക്ഷ്യമിടുന്നതെന്നും അദ്ദേഹം കൂട്ടിച്ചേർത്തു.
The SNDP Yogam Council has formally approved the unification efforts with the NSS, appointing Tushar Vellappally to lead further discussions with G. Sukumaran Nair. General Secretary Vellappally Natesan stated that a "Nayadi to Nazrani" unity is essential to counter minority consolidation and ensure true secularism in districts like Malappuram. He also criticized Minister Saji Cheriyan's recent apology regarding his constitutional remarks, labeling it a political gimmick aimed at securing votes from the Hindu and Christian communities.