പത്തനംതിട്ട: ശബരിമലയിലെ സ്വർണ്ണക്കൊള്ളയുമായി ബന്ധപ്പെട്ട അന്വേഷണം അതീവ ഗുരുതരമായ പുതിയ ഘട്ടത്തിലേക്ക് കടക്കുന്നു (Sabarimala Gold Theft). സന്നിധാനത്തെ ദ്വാരപാലക ശില്പങ്ങളിലെ സ്വർണ്ണപ്പാളികൾ കാണാതായതുമായി ബന്ധപ്പെട്ട കേസിന് പിന്നാലെ, ശബരിമലയിലെ കൊടിമരം പുനഃപ്രതിഷ്ഠിക്കാൻ തീരുമാനിച്ച നടപടിയിലും കേസെടുക്കാൻ പ്രത്യേക അന്വേഷണ സംഘം തീരുമാനിച്ചു. ഇതുസംബന്ധിച്ച് ഉടൻ തന്നെ പുതിയ എഫ്ഐആർ രജിസ്റ്റർ ചെയ്യും. ഹൈക്കോടതിയുടെ ഉത്തരവിലെ പരാമർശങ്ങളും ദേവസ്വം ബോർഡിന്റെ പക്കൽ രേഖകളില്ലാത്തതുമാണ് അന്വേഷണസംഘത്തെ ഇത്തരമൊരു നീക്കത്തിന് പ്രേരിപ്പിച്ചത്.
കൊടിമരം പുനഃപ്രതിഷ്ഠിക്കാനുള്ള ദേവസ്വം ബോർഡിന്റെ തീരുമാനത്തിൽ വലിയ ദുരൂഹതയുണ്ടെന്നാണ് അന്വേഷണസംഘം കരുതുന്നത്. പഴയ കൊടിമരം ചിതലരിച്ചു നശിച്ചതിനാലാണ് പുതിയത് സ്ഥാപിച്ചതെന്നായിരുന്നു ഔദ്യോഗിക വിശദീകരണം. എന്നാൽ, പഴയ കൊടിമരം കോൺക്രീറ്റ് തൂണിലാണ് നിർമ്മിച്ചിരുന്നതെന്നും അതിന് പുറത്താണ് സ്വർണ്ണപ്പറകൾ സ്ഥാപിച്ചിരുന്നതെന്നും കണ്ടെത്തിയിട്ടുണ്ട്. കോൺക്രീറ്റ് തൂൺ എങ്ങനെ ചിതലരിക്കുമെന്ന ചോദ്യമാണ് പ്രധാനമായും ഉയരുന്നത്. കൂടാതെ, ഈ കോൺക്രീറ്റ് തൂൺ എന്നാണ് സ്ഥാപിച്ചതെന്നോ അതിന്റെ പഴക്കം എത്രയാണെന്നോ വ്യക്തമാക്കുന്ന യാതൊരു രേഖയും ദേവസ്വം ബോർഡിന്റെ കൈവശമില്ല എന്നതും സംശയം വർധിപ്പിക്കുന്നു.
2014 മുതലുള്ള കൊടിമരം പുനഃപ്രതിഷ്ഠയുമായി ബന്ധപ്പെട്ട എല്ലാ നടപടികളും അന്വേഷണ പരിധിയിൽ വരും. കോൺക്രീറ്റ് തൂൺ മാറ്റാൻ തീരുമാനിച്ചത് മുതൽ ഹൈദരാബാദിലെ സ്പോൺസറെ കണ്ടെത്തിയത് വരെയുള്ള കാര്യങ്ങൾ എസ്ഐടി വിശദമായി പരിശോധിക്കും. ദ്വാരപാലക ശില്പങ്ങളിലെയും കട്ടിളപ്പാളികളിലെയും സ്വർണ്ണം കാണാതായ കേസിൽ കുറ്റപത്രം സമർപ്പിച്ചാലുടൻ ഈ മൂന്നാം കേസിൽ എഫ്ഐആർ രജിസ്റ്റർ ചെയ്യാനാണ് തീരുമാനം. കേസിൽ ഏതൊക്കെ ഉദ്യോഗസ്ഥരെയും മുൻ ബോർഡ് അംഗങ്ങളെയും പ്രതി ചേർക്കണമെന്ന കാര്യത്തിൽ നിയമോപദേശത്തിന് ശേഷം തീരുമാനമുണ്ടാകും.
The Special Investigation Team (SIT) probing the Sabarimala gold theft case has decided to register a third FIR, focusing on the re-installation of the sacred flagpole (Kodimaram). Investigators suspect foul play in the 2014 decision to replace the flagpole, as official claims cited termite damage to a structure that was actually made of concrete. With the Devaswom Board lacking records on the original flagpole's age, the SIT aims to probe the entire process, including the involvement of a Hyderabad-based sponsor.