തിരുവനന്തപുരം: തീവ്ര വോട്ടർ പട്ടികാ പരിഷ്കരണവുമായി ബന്ധപ്പെട്ട നടപടികളിൽ ഒരാഴ്ച അധികസമയം അനുവദിച്ച് കേന്ദ്ര തിരഞ്ഞെടുപ്പ് കമ്മീഷൻ ഉത്തരവിറക്കിയതിന് പിന്നാലെ പ്രതികരണവുമായി മുഖ്യ തിരഞ്ഞെടുപ്പ് ഓഫീസർ രംഗത്തെത്തി. എസ്.എസ്.ആർ. പ്രക്രിയ കൂടുതൽ കുറ്റമറ്റതാക്കാൻ അധിക സമയം ഉപയോഗിക്കുമെന്നും അദ്ദേഹം വ്യക്തമാക്കി.(SIR upload 81% completed, Chief Electoral Officer responds)
കേരളം ഉൾപ്പെടെ 12 സംസ്ഥാനങ്ങളിലെ സമയപരിധിയാണ് നീട്ടിയത്. പുതിയ ഉത്തരവ് പ്രകാരം ഡിസംബർ 11 വരെ എസ്.എസ്.ആർ. ഫോം വിതരണം ചെയ്യാം. ഡിസംബർ 16-നായിരിക്കും കരട് പട്ടിക പ്രസിദ്ധീകരിക്കുക. അന്തിമ പട്ടിക ഫെബ്രുവരി 14-നായിരിക്കും പുറത്തിറക്കുക.
നിലവിൽ എസ്.എസ്.ആർ. അപ്‌ലോഡ് 81 ശതമാനം പൂർത്തിയായിട്ടുണ്ട്. ഡിസംബർ രണ്ടിനകം തീർക്കാൻ ആയിരുന്നു ആദ്യ പദ്ധതി. അതുപോലെ തന്നെ മുന്നോട്ട് പോകും. നഗരപരിധിയിൽ പ്രത്യേകിച്ച്, കണ്ടെത്താൻ കഴിയാത്ത വോട്ടർമാരെ കണ്ടെത്താൻ സമയം കിട്ടും. കൂടുതൽ ബി.എൽ.ഒ.-ബി.എൽ.എ. (ബൂത്ത് ലെവൽ ഓഫീസർ - ഏജന്റ്) യോഗങ്ങൾ ചേരും.
പുതിയ വോട്ടർമാരെ ഉൾപ്പെടുത്താൻ പ്രത്യേക യജ്ഞം നടത്തും. ഫോം തിരികെ നൽകാത്തവർ അവസാന നിമിഷം വരെ കാത്തിരിക്കാതെ ഉടൻ നൽകണം. രണ്ട് ദിവസത്തിനകം ഫോം അപ്‌ലോഡ് പ്രക്രിയ കേരളത്തിൽ പൂർത്തിയാകും. കരട് പട്ടികയിൽ പരാതി അറിയിക്കാൻ ഒരു മാസം സമയം തന്നെ ലഭിക്കും, അതിൽ മാറ്റമില്ല. എന്യുമറേഷൻ ഫോം പ്രക്രിയക്കാണ് ഒരാഴ്ച കൂട്ടി നൽകിയത്.
കരട് പട്ടിക വരുമ്പോൾ പത്ത് ലക്ഷത്തോളം പേർ പുറത്തുപോകാൻ സാധ്യതയുണ്ടെന്നും 2002-ലെ ലിസ്റ്റിൽ ഇല്ലെങ്കിലും പട്ടികയിൽ ഉൾപ്പെടുത്തുമെന്നും അദ്ദേഹം അറിയിച്ചു. മാത്യു ടി. തോമസ് എം.എൽ.എക്ക് ഫോം നൽകിയാലും കരട് പട്ടികയിൽ വരും. അദ്ദേഹത്തിന് വോട്ട് നഷ്ടപ്പെടും എന്ന് ആശങ്ക വേണ്ട. തിരിച്ചറിയൽ രേഖയുണ്ടെങ്കിൽ വോട്ട് നഷ്ടമാകില്ല. ജില്ലാ കളക്ടർ ഇത് പരിശോധിക്കുന്നുണ്ട്. സമയം നീട്ടിക്കിട്ടിയില്ലെങ്കിലും പൂർത്തിയാക്കാമായിരുന്നുവെന്നും, തദ്ദേശ തിരഞ്ഞെടുപ്പ് കഴിഞ്ഞിട്ടാണ് കരട് പട്ടിക വരുന്നതെന്നും മുഖ്യ തിരഞ്ഞെടുപ്പ് ഓഫീസർ വ്യക്തമാക്കി.