തിരുവനന്തപുരം: തീവ്ര വോട്ടർ പട്ടിക പരിഷ്കരണവുമായി ബന്ധപ്പെട്ട് തിരഞ്ഞെടുപ്പ് കമ്മീഷൻ നൽകിയ കണക്കുകളിൽ പിശകുണ്ടെന്ന് ആരോപിച്ച് രാഷ്ട്രീയ കക്ഷികൾ പരാതി നൽകി. തിരികെ ലഭിക്കാത്ത എന്യുമറേഷൻ ഫോമുകളുടെ എണ്ണം 20 ലക്ഷത്തിൽ നിന്ന് 25 ലക്ഷമായി ഉയർന്നത് എങ്ങനെ എന്ന് സി.പി.എം., കോൺഗ്രസ്, മുസ്ലിം ലീഗ് എന്നീ പാർട്ടികൾ സംശയം ഉന്നയിച്ചു.(SIR, Political parties Doubts over undelivered forms)
തിരികെ ലഭിക്കാത്ത 25 ലക്ഷം ഫോമുകളിൽ 6,44,547 ഫോമുകൾ മരണപ്പെട്ടവരുടേതാണ് എന്ന കണക്കിൽ സി.പി.ഐ. സംശയം പ്രകടിപ്പിച്ചു. മരിച്ചവരുടെ പേര് വിവരങ്ങൾ ലഭ്യമാക്കണമെന്ന് മുസ്ലിം ലീഗും ആവശ്യപ്പെട്ടു. കരട് പട്ടിക പ്രസിദ്ധീകരിക്കും മുമ്പ്, എന്യുമറേഷൻ ഫോം തിരികെ കിട്ടാത്തവരെ കണ്ടെത്താൻ വീണ്ടും ശ്രമം നടത്തണമെന്ന് രാഷ്ട്രീയ കക്ഷികൾ ആവശ്യപ്പെട്ടു.
തിരികെ ലഭിക്കാത്തവരുടെ പട്ടിക ബൂത്ത് അടിസ്ഥാനത്തിൽ ബി.എൽ.എമാർക്ക് ഇന്ന് തന്നെ കൈമാറണമെന്നും, ഇവരുടെ വിവരങ്ങൾ അസംബ്ലി അടിസ്ഥാനത്തിൽ ലഭ്യമാക്കണമെന്നും ആവശ്യമുയർന്നു. അർഹതയുള്ള ഒരാളുടെയും പേര് വോട്ടർ പട്ടികയിൽ നിന്ന് ഒഴിവാക്കരുതെന്ന് ബി.ജെ.പി. യോഗത്തിൽ ആവശ്യപ്പെട്ടു.
രാഷ്ട്രീയ കക്ഷികളുടെ ആവശ്യങ്ങളോട് മുഖ്യ തിരഞ്ഞെടുപ്പ് ഓഫീസർ (സി.ഇ.ഒ.) പ്രതികരിച്ചത് എന്യുമറേഷൻ ഫോം തിരിച്ചു ലഭിക്കാത്ത 25 ലക്ഷം പേരുടെ വിവരങ്ങളും ബി.എൽ.എമാർക്ക് കൈമാറുമെന്നാണ്. മരണപ്പെട്ടവരുടെ വിവരങ്ങൾ വീടുകളിൽ നിന്ന് ശേഖരിച്ചതാണെന്നാണ് തിരഞ്ഞെടുപ്പ് കമ്മീഷൻ നൽകിയ വിശദീകരണം.
എന്യുമറേഷൻ ഫോം ഒപ്പിട്ട് നൽകിയവരെല്ലാം കരട് പട്ടികയിൽ ഉൾപ്പെടുത്തും. കരട് പട്ടികയിൽ ഉൾപ്പെടാത്തവരുടെ ലിസ്റ്റ് പ്രത്യേകം പ്രസിദ്ധീകരിക്കുമെന്നും സി.ഇ.ഒ. അറിയിച്ചു.