കോഴിക്കോട്: ബസിൽ വെച്ച് ലൈംഗികാതിക്രമം നടത്തിയെന്ന് ആരോപിച്ച് വീഡിയോ പ്രചരിപ്പിച്ചതിനെത്തുടർന്ന് യുവാവ് ജീവനൊടുക്കിയ സംഭവത്തിൽ പ്രതിയായ ഷിംജിത മുസ്തഫ പിടിയിലായി (Shimjitha Mustafa Arrested). വടകരയിലുള്ള ബന്ധുവീട്ടിൽ നിന്നാണ് പോലീസ് ഇവരെ കസ്റ്റഡിയിലെടുത്തത്. ദീപക്കിന്റെ മരണത്തിന് പിന്നാലെ ആത്മഹത്യാപ്രേരണാക്കുറ്റം ചുമത്തിയതോടെ ഷിംജിത ഒളിവിൽ പോവുകയായിരുന്നു. ഇവരെ കണ്ടെത്താനായി പോലീസ് ലുക്ക്ഔട്ട് നോട്ടീസ് പുറപ്പെടുവിച്ച് മണിക്കൂറുകൾക്കുള്ളിലാണ് അറസ്റ്റ് രേഖപ്പെടുത്തിയത്.
ഷിംജിത ഒളിവിൽ പോയത് പോലീസിന്റെ ഒത്തുകളിയാണെന്നും തെളിവുകൾ നശിപ്പിക്കാൻ പ്രതിക്ക് സമയം നൽകിയെന്നും ദീപക്കിന്റെ കുടുംബം നേരത്തെ ആരോപിച്ചിരുന്നു. പ്രതി വിദേശത്തേക്ക് കടക്കാൻ സാധ്യതയുണ്ടെന്ന റിപ്പോർട്ടുകൾക്കിടെയാണ് വടകരയിൽ നിന്ന് പിടികൂടുന്നത്. അതേസമയം, കേസിൽ അറസ്റ്റ് ഒഴിവാക്കാനായി ഷിംജിത കോഴിക്കോട് ജില്ലാ കോടതിയിൽ മുൻകൂർ ജാമ്യാപേക്ഷ സമർപ്പിച്ചിട്ടുണ്ട്. ഈ അപേക്ഷ കോടതി നാളെ പരിഗണിക്കാനിരിക്കെയാണ് പോലീസിന്റെ നിർണ്ണായക നീക്കം.
സംഭവദിവസം ബസിനുള്ളിൽ നടന്ന കാര്യങ്ങളെക്കുറിച്ച് കൂടുതൽ വ്യക്തത വരുത്താൻ ഷിംജിതയെ വിശദമായി ചോദ്യം ചെയ്യും. ബസിലെ സിസിടിവി ദൃശ്യങ്ങളിൽ ദീപക്കിനെതിരായ തെളിവുകളൊന്നും ലഭിക്കാത്തതും, യാത്രക്കാരോ ജീവനക്കാരോ അന്ന് പരാതി ഉന്നയിക്കാത്തതും ഷിംജിതയ്ക്ക് തിരിച്ചടിയാണ്. എഡിറ്റ് ചെയ്ത വീഡിയോ പ്രചരിപ്പിച്ച് ദീപക്കിനെ മാനസികമായി തകർത്തതിലൂടെ ആത്മഹത്യയ്ക്ക് പ്രേരിപ്പിച്ചു എന്നതാണ് ഇവർക്കെതിരെയുള്ള പ്രധാന കുറ്റം. ഷിംജിതയുടെ മൊബൈൽ ഫോൺ ഉൾപ്പെടെയുള്ളവ പോലീസ് ശാസ്ത്രീയ പരിശോധനയ്ക്ക് വിധേയമാക്കും
Social media influencer Shimjitha Mustafa has been apprehended from a relative's house in Vadakara following the suicide of a youth named Deepak. Shimjitha had been in hiding after being charged with abetment of suicide for posting a controversial video accusing Deepak of harassment, an allegation not supported by bus CCTV footage. While her anticipatory bail plea was set for hearing tomorrow, the police moved swiftly to arrest her after issuing a lookout notice to prevent any escape attempt abroad.