കൊച്ചി: കടന്നുപോയ 2025 എന്ന വർഷം തന്റെ ജീവിതത്തിലെ ഏറ്റവും മോശം കാലഘട്ടമായിരുന്നുവെന്ന് തുറന്നുപറഞ്ഞ് നടി ശാലിൻ സോയ. ഇൻസ്റ്റഗ്രാം പോസ്റ്റിലൂടെയാണ് താരം തന്റെ അതിജീവനത്തിന്റെ കഥ വൈകാരികമായി പങ്കുവെച്ചത്. കരിയറിൽ നേട്ടങ്ങളുണ്ടായെങ്കിലും വ്യക്തിജീവിതത്തിൽ അത്രയേറെ വെല്ലുവിളികൾ നിറഞ്ഞതായിരുന്നു കഴിഞ്ഞ വർഷമെന്ന് നടി സൂചിപ്പിക്കുന്നു.
"2025 എന്റെ ജീവിതത്തിലെ ഇതുവരെയുള്ളതിൽ ഏറ്റവും കഠിനമായ വർഷമായിരുന്നു. ഈ വർഷം എനിക്ക് എന്താണ് സംഭവിച്ചതെന്ന് ഇപ്പോഴും മനസ്സിലാകുന്നില്ല. എന്റെ ഏറ്റവും ദുർബലമായ ഏകാന്തതയിലേക്ക് ഞാൻ എത്തിപ്പെട്ടു. പക്ഷേ ഞാൻ ഇപ്പോഴും ഇവിടെയുണ്ട്. അത് എങ്ങനെയാണെന്ന് എനിക്കറിയില്ല, പക്ഷേ ഞാൻ അതിജീവിച്ചു എന്നതാണ് യാഥാർത്ഥ്യം." 2025-ന് വിട നൽകിക്കൊണ്ട് ശാലിൻ കുറിച്ചു.
ഓട്ടോഗ്രാഫ്' എന്ന സീരിയലിലൂടെ അഭിനയരംഗത്തെത്തിയ ശാലിൻ പിന്നീട് മലയാള സിനിമകളിൽ സജീവമായി. 2023-ൽ പുറത്തിറങ്ങിയ 'കണ്ണകി' എന്ന തമിഴ് ചിത്രത്തിലെ അഭിനയത്തിന് വലിയ പ്രശംസ ലഭിച്ചു. സിനിമകളേക്കാൾ ഉപരി മിനിസ്ക്രീനിലാണ് ശാലിൻ കഴിഞ്ഞ വർഷം സജീവമായിരുന്നത്. തമിഴിലെ 'സമയൽ എക്സ്പ്രസ് സീസൺ 2'-ലൂടെ തമിഴ് പ്രേക്ഷകർക്കിടയിൽ താരം ശ്രദ്ധിക്കപ്പെട്ടു. 2024-ൽ 'നരേന്ദ്രൻസ് ഹണിമൂൺ' എന്ന വെബ് സീരീസിലാണ് താരം അവസാനമായി അഭിനയിച്ചത്.
കൃത്യമായി എന്ത് പ്രശ്നമാണ് നേരിട്ടതെന്ന് താരം വെളിപ്പെടുത്തിയിട്ടില്ലെങ്കിലും, മാനസികമായി തളർത്തിയ ഒരു കാലഘട്ടത്തെ അതിജീവിച്ചു എന്ന ശാലിന്റെ കുറിപ്പിന് ആരാധകരിൽ നിന്നും വലിയ പിന്തുണയാണ് ലഭിക്കുന്നത്.