പാലക്കാട്: കേന്ദ്ര സർക്കാരിന്റെ പിഎം ശ്രീ പദ്ധതിയിൽ കേരളം പങ്കാളികളായതിൽ ആശങ്കയുണ്ടെന്ന് സിപിഎം വിദ്യാർത്ഥി സംഘടനയായ എസ്എഫ്ഐ സംസ്ഥാന സെക്രട്ടറി പി.എസ്. സഞ്ജീവ്. ഈ വിഷയത്തിൽ സർക്കാരിനെ ആശങ്ക അറിയിക്കുമെന്ന് അദ്ദേഹം മാധ്യമങ്ങളോട് പറഞ്ഞു.(SFI expresses concern over PM SHRI scheme )
എസ്എഫ്ഐ നിലപാട്
ദേശീയ വിദ്യാഭ്യാസ നയത്തിന് എതിര്: എസ്എഫ്ഐ ദേശീയ വിദ്യാഭ്യാസ നയത്തിന് (എൻഇപി) എതിരാണ്. അതിലെ വർഗീയ നിലപാട് എതിർക്കപ്പെടേണ്ടതാണ്. അത് വിദ്യാർത്ഥി സമൂഹത്തിന് അപകടകരമാണ്. ഇക്കാര്യത്തിൽ എസ്എഫ്ഐക്ക് ആശങ്കയുണ്ട്. ഈ ആശങ്ക നേരത്തെ സർക്കാരിനെ അറിയിച്ചിരുന്നു.
നയത്തിലെ മോശം കാര്യങ്ങൾ ഒഴിവാക്കി വേണം പദ്ധതി നടപ്പാക്കാൻ. ഇക്കാര്യം സർക്കാർ എസ്എഫ്ഐയോട് ചർച്ച ചെയ്തിരുന്നുവെന്നും നിലപാട് അറിയിച്ചിരുന്നുവെന്നും സഞ്ജീവ് വ്യക്തമാക്കി. സംഘപരിവാറിനെതിരായ സമരം തുടരുമെന്നും അദ്ദേഹം കൂട്ടിച്ചേർത്തു.
സിപിഐയുടെ കടുത്ത അമർഷം
പിഎം ശ്രീ പദ്ധതിയിൽ കേരളം ഒപ്പുവെച്ചതിൽ ഭരണമുന്നണിയിലെ രണ്ടാമത്തെ കക്ഷിയായ സിപിഐ കടുത്ത അമർഷത്തിലാണ്. ബിനോയ് വിശ്വം ഉൾപ്പെടെയുള്ള പ്രധാന നേതാക്കളെല്ലാം പരസ്യമായി പ്രതിഷേധം പങ്കുവെച്ചു. നിർണ്ണായകമായ സിപിഐ സെക്രട്ടറിയേറ്റ് യോഗം നിലവിൽ തിരുവനന്തപുരത്ത് ചേരുകയാണ്.
സെക്രട്ടേറിയറ്റ് യോഗം തുടങ്ങും മുൻപ് ബിനോയ് വിശ്വം പ്രതികരിച്ചത് 'ഇടത് മുന്നണി പോകേണ്ട വഴി ഇതല്ല' എന്നാണ്. മുന്നണി വിടുമോയെന്ന ചോദ്യത്തിന്, "12.30-ക്ക് ശേഷം പറയാം" എന്നായിരുന്നു അദ്ദേഹത്തിന്റെ മറുപടി. സിപിഐയുടെ കടുത്ത എതിർപ്പ് വകവെക്കാതെയാണ് കേരളം പിഎം ശ്രീ പദ്ധതിയിൽ ഒപ്പിട്ടത്. ഇന്നലെയാണ് കേന്ദ്രവും സംസ്ഥാനവും തമ്മിൽ ധാരണാപത്രത്തിൽ ഒപ്പിട്ടത്.
സംസ്ഥാനത്തിന് വേണ്ടി വിദ്യാഭ്യാസ സെക്രട്ടറിയാണ് ഒപ്പ് വെച്ചത്. ഇതോടെ തടഞ്ഞുവെച്ച 1500 കോടിയുടെ സർവശിക്ഷാ കേരളം (എസ്എസ്കെ) ഫണ്ട് ഉടൻ അനുവദിക്കുമെന്ന് കേന്ദ്രം ഉറപ്പ് നൽകി. മൂന്ന് തവണ മന്ത്രിസഭയിലടക്കം സിപിഐ എതിർപ്പ് ഉന്നയിച്ച പദ്ധതിയിലാണ് ഇപ്പോൾ കേരളം ചേർന്നിരിക്കുന്നത്. ഇതാണ് സിപിഐ കടുത്ത തീരുമാനങ്ങളിലേക്ക് കടക്കാൻ കാരണം.