തിരുവനന്തപുരം: ശബരിമല സ്വർണ്ണ മോഷണക്കേസിൽ അറസ്റ്റിലായ മുഖ്യ കണ്ഠര് രാജീവരെ (66) 14 ദിവസത്തേക്ക് റിമാൻഡ് ചെയ്തു. കൊല്ലം വിജിലൻസ് കോടതിയാണ് റിമാൻഡ് ഉത്തരവ് പുറപ്പെടുവിച്ചത്. വെള്ളിയാഴ്ച പുലർച്ചെ ചോദ്യം ചെയ്യലിനായി ഹാജരായ തന്ത്രിയെ എട്ട് മണിക്കൂർ നീണ്ട വിശദമായ മൊഴിയെടുപ്പിന് ശേഷമാണ് പ്രത്യേക അന്വേഷണ സംഘം (SIT) അറസ്റ്റ് ചെയ്തത്.
ശ്രീകോവിൽ വാതിലിന്റെ കട്ടിളപ്പാളിയിലെ സ്വർണ്ണം കവർന്ന കേസിലാണ് നിലവിൽ പതിമൂന്നാം പ്രതിയായി തന്ത്രിയുടെ അറസ്റ്റ് രേഖപ്പെടുത്തിയിരിക്കുന്നത്. ദ്വാരപാലക ശിൽപ്പത്തിലെ സ്വർണ്ണപ്പാളികൾ കവർന്ന കേസിലും ഇദ്ദേഹത്തെ പ്രതി ചേർക്കുമെന്നാണ് വിവരം.
റിമാൻഡ് റിപ്പോർട്ടിലെ ഗുരുതര കണ്ടെത്തലുകൾ
സ്വർണ്ണം മോഷ്ടിക്കാൻ മുഖ്യപ്രതി ഉണ്ണികൃഷ്ണൻ പോറ്റിക്കും സംഘത്തിനും തന്ത്രി കുറ്റകരമായ മൗനാനുവാദം നൽകിയെന്ന് എസ്ഐടി കോടതിയെ അറിയിച്ചു. 2019 മേയ് 14 മുതൽ 19 വരെയുള്ള കാലയളവിൽ തന്ത്രി സന്നിധാനത്തുള്ളപ്പോഴാണ് ശ്രീകോവിൽ വാതിലിന്റെ പാളികൾ അഴിച്ചുമാറ്റി സ്വർണ്ണം കടത്തിയത്. ക്ഷേത്രത്തിന്റെ പരമാധികാരിയായ തന്ത്രിയുടെ അറിവോടെയാണ് ഈ തിരിമറികൾ നടന്നതെന്ന് ശാസ്ത്രീയ തെളിവുകളുടെ അടിസ്ഥാനത്തിൽ അന്വേഷണ സംഘം സ്ഥിരീകരിച്ചു.
ഐപിസി 120(ബി) (ഗൂഢാലോചന), 409 (വിശ്വാസവഞ്ചന), അഴിമതി നിരോധന നിയമത്തിലെ വിവിധ വകുപ്പുകൾ എന്നിവയടക്കം ഗുരുതരമായ കുറ്റങ്ങളാണ് ഇദ്ദേഹത്തിനെതിരെ ചുമത്തിയിരിക്കുന്നത്. ഹൈക്കോടതിയുടെ മേൽനോട്ടത്തിൽ നടക്കുന്ന അന്വേഷണം നിഷ്പക്ഷമാണെന്ന് കോടതി നേരത്തെ വിലയിരുത്തിയിരുന്നു. തന്ത്രിയുടെ അറസ്റ്റോടെ കേസിൽ ഇതുവരെ പിടിയിലായവരുടെ എണ്ണം പതിനൊന്നായി.