കൊച്ചി: ശബരിമല സ്വർണക്കൊള്ളക്കേസിൽ എൻഫോഴ്സ്മെന്‍റ് ഡയറക്ട്രേറ്റിന്‍റെ (ഇ.ഡി.) അന്വേഷണം ഉണ്ടാകുമോ എന്നതിൽ ഹൈക്കോടതിയുടെ ഇന്നത്തെ തീരുമാനം നിർണായകമാകും. സ്വർണക്കൊള്ളയുമായി ബന്ധപ്പെട്ട് സംസ്ഥാന പോലീസ് രജിസ്റ്റർ ചെയ്ത കേസുകളുടെ രേഖകൾ ആവശ്യപ്പെട്ട് ഇ.ഡി. നൽകിയ ഹർജിയാണ് ഹൈക്കോടതി ഇന്ന് പരിഗണിക്കുന്നത്.(Sabarimala gold theft case, High Court to announce decision today in ED investigation)
കേസിന്‍റെ എഫ്.ഐ.ആർ, അനുബന്ധ മൊഴികൾ, മറ്റ് രേഖകൾ എന്നിവയുടെ പകർപ്പാണ് കേന്ദ്ര ഏജൻസി തേടിയിരിക്കുന്നത്. ശബരിമല സ്വർണക്കൊള്ളയിൽ കള്ളപ്പണ ഇടപാട് നടന്നതായി സംശയിക്കുന്നെന്നും, വിശദമായ അന്വേഷണത്തിനായി കേസുകളുടെ രേഖകളും വിവരങ്ങളും അനിവാര്യമാണെന്നുമാണ് ഇ.ഡി.യുടെ വാദം.
നേരത്തെ ഈ ആവശ്യമുന്നയിച്ച് റാന്നി കോടതിയിൽ നൽകിയ അപേക്ഷ തള്ളിയതോടെയാണ് ഇ.ഡി. ഹൈക്കോടതിയെ സമീപിച്ചത്. സംസ്ഥാന പോലീസ് രജിസ്റ്റർ ചെയ്ത കേസുകളുടെ രേഖകൾ ഇ.ഡിക്ക് വിട്ടുനൽകാൻ ഹൈക്കോടതി ഉത്തരവിട്ടാൽ അത് കേസിന്‍റെ ഗതിയിൽ വഴിത്തിരിവാകും. കള്ളപ്പണ ഇടപാടുകൾക്ക് സൂചന ലഭിച്ചാൽ കേസിൽ ഇ.ഡി.യുടെ അന്വേഷണം ഉറപ്പാക്കാനാണ് സാധ്യത.
സ്വർണക്കൊള്ള വിവാദങ്ങൾക്കിടെ കഴിഞ്ഞ ദിവസം ചുമതലയേറ്റ തിരുവിതാംകൂർ ദേവസ്വം ബോർഡ് പ്രസിഡന്‍റ് കെ. ജയകുമാർ വിഷയത്തിൽ നിലപാട് കടുപ്പിച്ചു. ശബരിമലയിലെ തെറ്റായ പ്രവണതകളിൽ ശക്തമായ തിരുത്തുണ്ടാകുമെന്ന് അദ്ദേഹം വ്യക്തമാക്കി.
"ഇന്നലെവരെ ഞാൻ സൗമ്യനായ ഉദ്യോഗസ്ഥനായിരുന്നു. ഇനി ആ സൗമ്യത ഉണ്ടാകില്ല. ഭക്തർക്ക് സൗകര്യങ്ങൾ ഒരുക്കുകയാണ് എന്‍റെ പ്രഥമ പരിഗണന," ജയകുമാർ പറഞ്ഞു. സ്പോൺസറെന്ന മേലങ്കി അണിഞ്ഞുവരുന്ന എല്ലാവരെയും അംഗീകരിക്കില്ല. അവരുടെ പശ്ചാത്തലങ്ങൾ പരിശോധിച്ച ശേഷം മാത്രമേ നടപടികളിലേക്ക് കടക്കൂ.
അന്വേഷണത്തിന് എല്ലാ പിന്തുണയും: ശബരിമല സ്വർണക്കൊള്ളയുമായി ബന്ധപ്പെട്ട് നിലവിൽ നടക്കുന്ന അന്വേഷണത്തിന് എല്ലാ സൗകര്യവും നൽകും. തനിക്ക് ശബരിമലയിൽ ഒരു മിഷൻ ഉണ്ടെന്നും അത് ആദ്യം പറയേണ്ടത് അയ്യപ്പനോടാണെന്നും അദ്ദേഹം കൂട്ടിച്ചേർത്തു.
ദേവസ്വം പ്രസിഡന്‍റായ ശേഷം ആദ്യമായി ശബരിമല സന്ദർശിക്കുന്നതിനിടെയാണ് മുൻ ചീഫ് സെക്രട്ടറി കൂടിയായ കെ. ജയകുമാർ ഈ കാര്യങ്ങൾ വ്യക്തമാക്കിയത്. പുതിയ ഭരണസമിതി അധികാരമേറ്റ ശേഷം ശബരിമലയിൽ അവിഹിതമായ കാര്യങ്ങൾക്ക് നിയന്ത്രണം കൊണ്ടുവരുമെന്ന് അദ്ദേഹം നേരത്തെ സൂചന നൽകിയിരുന്നു. വിവാദങ്ങളുടെ പശ്ചാത്തലത്തിൽ, ദേവസ്വം ബോർഡിന് മുഖം മിനുക്കൽ ദൗത്യവുമായാണ് കെ. ജയകുമാറിനെ പ്രസിഡന്‍റ് സ്ഥാനത്തേക്ക് കൊണ്ടുവന്നത്. സി.പി.ഐ പ്രതിനിധിയായി മുൻ മന്ത്രി കെ. രാജുവും ദേവസ്വം ബോർഡ് അംഗമായി സത്യപ്രതിജ്ഞ ചെയ്ത് ചുമതലയേറ്റിരുന്നു.