തിരുവനന്തപുരം: ശബരിമല ശ്രീകോവിലിലെ സ്വർണപ്പാളികൾ കാണാതായതുമായി ബന്ധപ്പെട്ട സ്വർണക്കവർച്ച കേസിൽ, തിരുവിതാംകൂർ ദേവസ്വം ബോർഡ് മുൻ പ്രസിഡന്റ് എ. പത്മകുമാർ ഇന്ന് പ്രത്യേക അന്വേഷണ സംഘത്തിന് (എസ്എടി) മുന്നിൽ ഹാജരായേക്കും. എൻ. വാസുവിന്റെ അറസ്റ്റിന് പിന്നാലെയാണ് അന്വേഷണം പത്മകുമാറിലേക്ക് നീളുന്നത്. അറസ്റ്റ് ഉടനുണ്ടാകാനുള്ള സാധ്യതയും നിലനിൽക്കുന്നുണ്ട്.(Sabarimala gold theft case, A Padmakumar may appear for questioning today)
കേസിൽ കൂടുതൽ തെളിവുകൾ ശേഖരിക്കുന്നതിന്റെ ഭാഗമായാണ് എ. പത്മകുമാറിനെ ഇന്ന് ചോദ്യം ചെയ്യലിനായി വിളിപ്പിച്ചിരിക്കുന്നത്. ദേവസ്വം ബോർഡ് മുൻ സെക്രട്ടറി എസ്. ജയശ്രീയെ ചൊവ്വാഴ്ച വരെ അറസ്റ്റ് ചെയ്യുന്നത് ഹൈക്കോടതി താൽക്കാലികമായി തടഞ്ഞിട്ടുണ്ട്.
ശബരിമല ശ്രീകോവിലിലെ സ്വർണപ്പാളികളുടെ ശാസ്ത്രീയ പരിശോധനയ്ക്കുള്ള സാമ്പിളുകൾ പ്രത്യേക അന്വേഷണ സംഘം മറ്റന്നാൾ ഉച്ചയ്ക്ക് ശേഷം ശേഖരിക്കും. സ്വർണക്കൊള്ളയുമായി ബന്ധപ്പെട്ട വിവാദങ്ങൾ കത്തിനിൽക്കുന്ന ഈ സാഹചര്യത്തിൽ, തിരുവിതാംകൂർ ദേവസ്വം ബോർഡിന്റെ പുതിയ ഭരണസമിതി ഇന്ന് ചുമതലയേൽക്കും. പ്രസിഡന്റ് ആയി മുൻ ചീഫ് സെക്രട്ടറി കെ. ജയകുമാർ ആണ് സ്ഥാനമേൽക്കുന്നത്. മുൻ മന്ത്രി കെ. രാജുവും ചുമതലയേൽക്കും.
രാവിലെ 11:30-ന് ദേവസ്വം ബോർഡ് ആസ്ഥാനത്ത് വെച്ചാണ് ഇരുവരും സത്യപ്രതിജ്ഞ ചെയ്യുക. രണ്ട് വർഷമാണ് പുതിയ സമിതിയുടെ കാലാവധി. പ്രസിഡന്റായിരുന്ന പി.എസ്. പ്രശാന്തും അംഗം എ. അജികുമാറും വ്യാഴാഴ്ച സ്ഥാനമൊഴിഞ്ഞിരുന്നു. എന്നാൽ സ്വർണക്കവർച്ച കേസ് വിവാദമായ പശ്ചാത്തലത്തിൽ മുൻ സമിതിയുടെ യാത്രയയപ്പ് സമ്മേളനം ഒഴിവാക്കിയിരുന്നു. സ്വർണക്കവർച്ചയുമായി ബന്ധപ്പെട്ട് മുൻ ഉദ്യോഗസ്ഥർ ആരോപണവിധേയരാവുകയും അറസ്റ്റിലാവുകയും ചെയ്ത സാഹചര്യത്തിൽ, ദേവസ്വം ബോർഡിന്റെ വിശ്വാസ്യതയും സുതാര്യതയും ഉറപ്പാക്കുക എന്ന വലിയ ദൗത്യമാണ് പുതിയ ഭരണസമിതിക്ക് മുന്നിലുള്ളത്.