പത്തനംതിട്ട: ശബരിമല സ്വർണക്കൊള്ളക്കേസിൽ അറസ്റ്റിലായ മുൻ തിരുവാഭരണം കമ്മീഷണർ കെ.എസ്. ബൈജുവിൻ്റെ റിമാൻഡ് കാലാവധി വീണ്ടും നീട്ടി. 14 ദിവസത്തേക്കാണ് ഇയാളെ കൊല്ലം വിജിലൻസ് കോടതി റിമാൻഡ് ചെയ്തത്. കസ്റ്റഡി കാലാവധി അവസാനിച്ചതിനെ തുടർന്നാണ് ശനിയാഴ്ച ബൈജുവിനെ കോടതിയിൽ ഹാജരാക്കിയത്.
ശബരിമല ദ്വാരപാലക ശിൽപ്പങ്ങളുടെ കേസിലാണ് ബൈജുവിനെതിരെ നടപടിയുണ്ടായത്. സ്വർണക്കൊള്ളക്കേസിൽ ഇയാൾ ഏഴാം പ്രതിയാണ്. 2019-ൽ മഹസർ തയ്യാറാക്കുന്ന സമയത്തും സ്വർണ്ണപ്പാളികൾ ഉണ്ണികൃഷ്ണൻ പോറ്റിയുടെ പക്കൽ കൊടുത്തുവിടുമ്പോഴും ബൈജുവായിരുന്നു തിരുവാഭരണം കമ്മീഷണർ.
സ്വർണ്ണപ്പാളികൾ ശബരിമലയിൽനിന്ന് കൊണ്ടുപോകുമ്പോൾ കെ.എസ്. ബൈജു സ്ഥലത്ത് ഉണ്ടായിരുന്നില്ല. പാളികൾ കൈമാറുമ്പോൾ തൂക്കം ഉൾപ്പെടെ രേഖപ്പെടുത്തേണ്ടത് തിരുവാഭരണം കമ്മീഷണറാണ്. ഈ സമയത്തെ ബൈജുവിൻ്റെ അസാന്നിധ്യം ഗൂഢാലോചനയ്ക്ക് തെളിവാണെന്നാണ് പ്രത്യേക അന്വേഷണ സംഘത്തിൻ്റെ (എസ്.ഐ.ടി.) കണ്ടെത്തൽ.
ശനിയാഴ്ച കോടതിയിൽ ഹാജരാക്കിയ ബൈജുവിനെ വൈകുന്നേരം നാലു മണിവരെ എസ്.ഐ.ടി.യുടെ കസ്റ്റഡിയിൽ വിട്ടിരുന്നു.