തിരുവനന്തപുരം : ഇന്നും നിയമസഭയിൽ ശബരിമല സ്വർണ്ണപ്പാളി വിഷയത്തിൽ പ്രതിപക്ഷ ബഹളം. ചോദ്യോത്തരവേള ആരംഭിച്ചപ്പോൾ തന്നെ പ്രതിപക്ഷം ബഹളം വയ്ക്കുകയായിരുന്നു. ദ്വാരപാലക ശിൽപ്പം വിൽപ്പന നടത്തിയെന്ന ഹൈക്കോടതി നിരീക്ഷണം ഞെട്ടിക്കുന്നതാണെന്നാണ് വി ഡി സതീശൻ പറഞ്ഞത്. (Sabarimala gold case in Kerala Assembly Session)
ദേവസ്വം മന്ത്രി രാജി വയ്ക്കണമെന്നും, ദേവസ്വം ബോർഡിനെ പുറത്താക്കണമെന്നും അദ്ദേഹം ആവശ്യമുന്നയിച്ചു. എന്നാൽ, ഇത് ഹൈക്കോടതിയെ പോലും കണക്കിലെടുക്കാത്ത പ്രതിപക്ഷം ആണെന്ന് മന്ത്രി പി രാജീവ് തിരിച്ചടിച്ചു. അന്വേഷണം കോടതിയുടെ മേൽനോട്ടത്തിലാണ് നടക്കുന്നതെന്നും, സർക്കാരും ദേവസ്വം ബോർഡും അതിനെ സ്വാഗതം ചെയ്തിട്ടുണ്ടെന്നും അദ്ദേഹം ചൂണ്ടിക്കാട്ടി.
സുപ്രീം കോടതി ഇന്നലെയാണ് രാഷ്ട്രീയ കളിയുമായി വരരുതെന്ന് പ്രതിപക്ഷത്തോട് പറഞ്ഞതെന്നും മന്ത്രി എം ബി രാജേഷ് ഊന്നിപ്പറഞ്ഞു. പ്രതിപക്ഷം നടുത്തളത്തിൽ ഇറങ്ങി പ്രതിഷേധമുയർത്തി. ഇതോടെ ചോദ്യോത്തര വേള റദ്ദാക്കി.