കോഴിക്കോട്: സ്വകാര്യ ബസിൽ വെച്ച് ലൈംഗികാതിക്രമം നടത്തിയെന്ന് ആരോപിച്ച് വീഡിയോ പ്രചരിപ്പിച്ചതിനെത്തുടർന്ന് യുവാവ് ജീവനൊടുക്കിയ സംഭവത്തിൽ പ്രതി ഷിംജിത മുസ്തഫയെ പൂർണ്ണമായും പ്രതിക്കൂട്ടിലാക്കി പോലീസ് റിമാൻഡ് റിപ്പോർട്ട് (Deepak Suicide Case). ബസിനുള്ളിൽ വെച്ച് ദീപക് പീഡനമോ ശാരീരിക ഉപദ്രവമോ നടത്തിയിട്ടില്ലെന്ന് പോലീസ് റിപ്പോർട്ടിൽ വ്യക്തമാക്കുന്നു. പ്രതിയായ ഷിംജിത ഏഴ് വീഡിയോകളാണ് ചിത്രീകരിച്ചത്. ഈ ദൃശ്യങ്ങൾ സമൂഹമാധ്യമങ്ങളിലൂടെ പ്രചരിപ്പിച്ചതിലുള്ള കടുത്ത മനോവിഷമമാണ് ദീപക്കിനെ ആത്മഹത്യയിലേക്ക് നയിച്ചതെന്നും റിപ്പോർട്ടിൽ പരാമർശമുണ്ട്.
കേസുമായി ബന്ധപ്പെട്ട് കൂടുതൽ തെളിവുകൾ ശേഖരിക്കുന്നതിനായി അന്വേഷണസംഘം ഷിംജിതയെ കസ്റ്റഡിയിൽ വിട്ടുകിട്ടാൻ അപേക്ഷ നൽകി. അതേസമയം, അറസ്റ്റിന് ശേഷവും താൻ ലൈംഗിക അതിക്രമത്തിന് ഇരയായി എന്ന മൊഴിയിൽ ഷിംജിത ഉറച്ചുനിൽക്കുകയാണ്. ദീപക് അതിക്രമം നടത്തിയെന്നും അത് തെളിയിക്കാനാണ് ദൃശ്യങ്ങൾ പകർത്തിയതെന്നുമാണ് ഇവരുടെ വാദം. എന്നാൽ, ഫോണിൽ നിന്ന് കണ്ടെടുത്ത വിവാദ ദൃശ്യങ്ങൾ എഡിറ്റ് ചെയ്താണ് പ്രചരിപ്പിച്ചതെന്നാണ് പോലീസിന്റെ പ്രാഥമിക കണ്ടെത്തൽ.
വിഷയത്തിൽ കൂടുതൽ വ്യക്തത വരുത്തുന്നതിനായി ഷിംജിതയുടെ മൊബൈൽ ഫോൺ ശാസ്ത്രീയ പരിശോധനയ്ക്കായി അയച്ചിട്ടുണ്ട്. വീഡിയോ ചിത്രീകരിച്ച രീതിയും അത് എഡിറ്റ് ചെയ്ത് പ്രചരിപ്പിച്ച സാഹചര്യവും പോലീസ് വിശദമായി പരിശോധിച്ചുവരികയാണ്. ഒരു യുവാവിന്റെ ജീവൻ നഷ്ടപ്പെടാൻ കാരണമായ സൈബർ ആക്രമണത്തിന് പിന്നിലെ ഗൂഢാലോചനയും പോലീസ് അന്വേഷിക്കുന്നുണ്ട്.
The remand report in the case of Deepak's suicide following a viral video has held the accused, Shimjitha Mustafa, responsible. According to the police report, no sexual harassment or physical assault occurred on the bus as alleged by her. Shimjitha reportedly filmed seven videos and circulated edited versions, which led to Deepak's distress and eventual suicide. While Shimjitha maintains her allegations of harassment, police are conducting forensic examinations on her mobile phone to verify the authenticity of the footage.