തൃശ്ശൂർ : അഞ്ചുവയസുകാരിക്ക് നേരെ ലൈംഗിക അതിക്രമം നടത്തിയ കേസിൽ പ്രതിക്ക് 66 വർഷം കഠിന തടവ്.പാലക്കാട് ചാഴിയാട്ടിരി പനയപ്പുള്ളി വീട്ടിൽ സിജുവിനെ (33) 66 വർഷം കഠിനതടവിന് ശിക്ഷിച്ചത്. തടവിന് പുറമേ രണ്ട് ലക്ഷം രൂപ പിഴയും പ്രതി ഒടുക്കണമെന്ന് വടക്കാഞ്ചേരി ഫാസ്റ്റ് ട്രാക്ക് സ്‌പെഷ്യൽ (പോക്സോ ) കോടതി വിധിച്ചു.
2018 ഡിസംബറിൽ കേസിനാസ്പദമായ സംഭവം. പ്രതിയും പെൺകുട്ടിയുടെ അമ്മയും സുഹൃത്തുകളാണ്.പല ദിവസങ്ങളിൽ ഇവർ പ്രതിയുടെ കൂടെ വാടക വീട്ടിൽ താമസിച്ചിരുന്നു. ഈ സമയത്ത് ഇയാൾ പല തവണ കുട്ടിക്ക് നേരെ ലൈംഗിക അതിക്രമം നടത്തിയെന്നാണ് പ്രോസിക്യൂഷൻ കേസ്.
കുട്ടിയെയും 8 വയസ്സുള്ള സഹോദരനെയും വീട്ടിൽ പൂട്ടിയിട്ട് പുറത്തുപോയ കുട്ടികളുടെ അമ്മയും പ്രതിയും ഏറെ സമയമായിട്ടും തിരികെ വരാതായതിനെ തുടർന്ന് നാട്ടുകാർ പോലീസിൽ വിവരമറിയിച്ചതിനെ തുടർന്നാണ് സംഭവം പുറത്തറിയുന്നത്.