തിരുവനന്തപുരം: കേരളത്തിൽ വളരുന്ന ഒരേയൊരു രാഷ്ട്രീയ ശക്തി ബി.ജെ.പി.യാണെന്ന് പാർട്ടിയുടെ സംസ്ഥാന അധ്യക്ഷൻ രാജീവ് ചന്ദ്രശേഖർ അവകാശപ്പെട്ടു. തദ്ദേശ തിരഞ്ഞെടുപ്പിൽ പലയിടത്തും എൻ.ഡി.എയുടെ വോട്ട് വിഹിതം വർദ്ധിച്ചത് ചൂണ്ടിക്കാട്ടിയാണ് അദ്ദേഹം ഈ നിലപാട് വ്യക്തമാക്കിയത്.(Rajeev Chandrasekhar says BJP is the only growing political force in Kerala)
സാമൂഹിക മാധ്യമമായ എക്സിൽ പങ്കുവെച്ച കുറിപ്പിലാണ് രാജീവ് ചന്ദ്രശേഖർ തന്റെ വാദങ്ങൾ വിശദീകരിച്ചത്. കോട്ടയം ജില്ലയിലെ ഈരാറ്റുപേട്ട ബ്ലോക്ക് പഞ്ചായത്തിൽ എൻ.ഡി.എയുടെ വോട്ട് വിഹിതം 2020-നെ അപേക്ഷിച്ച് ഇരട്ടിയിലധികം വർദ്ധിച്ചു എന്ന് അദ്ദേഹം ചൂണ്ടിക്കാട്ടി.
ഈ പ്രവണത ഒറ്റപ്പെട്ടതല്ലെന്നും, സംസ്ഥാനത്തുടനീളം ഇത്തരത്തിലുള്ള മുന്നേറ്റങ്ങൾ ബി.ജെ.പി.ക്കുണ്ടായെന്നും അദ്ദേഹം കുറിച്ചു. കേരളത്തിൽ മുഖ്യധാരാ രാഷ്ട്രീയ പാർട്ടികൾക്ക് വെല്ലുവിളിയായി ബി.ജെ.പി. വളരുകയാണെന്ന സൂചനയാണ് തദ്ദേശ തിരഞ്ഞെടുപ്പ് ഫലങ്ങൾ നൽകുന്നതെന്നാണ് രാജീവ് ചന്ദ്രശേഖറിന്റെ വിലയിരുത്തൽ.