തിരുവനന്തപുരം: ലൈംഗിക പീഡന കേസിൽ ഒളിവിലുള്ള പാലക്കാട് എം.എൽ.എ. രാഹുൽ മാങ്കൂട്ടത്തിൽ, പരാതിക്കാരിയായ യുവതിക്കെതിരെ കൂടുതൽ തെളിവുകൾ തിരുവനന്തപുരം ജില്ലാ കോടതിയിൽ ഹാജരാക്കി. ഇന്നലെ തിരുവനന്തപുരത്തെത്തിയ രാഹുൽ, മുൻകൂർ ജാമ്യ ഹർജിയുടെ ഭാഗമായിട്ടാണ് സീൽഡ് കവറിൽ തെളിവുകൾ സമർപ്പിച്ചത്.(Rahul Mamkootathil submits more evidence in sealed cover against the woman in court)
രാഹുൽ മാങ്കൂട്ടത്തിൽ കോടതിയിൽ ഒൻപത് തെളിവുകളാണ് സമർപ്പിച്ചിരിക്കുന്നത്. ഇതിൽ പ്രധാനമായും യുവതിയുടെ മൊഴികളെ ഖണ്ഡിക്കുന്ന വിവരങ്ങളാണ് ഉൾപ്പെടുത്തിയിരിക്കുന്നത്. യുവതി ജോലിചെയ്തിരുന്ന ചാനലിന്റെ മേധാവി രാഹുലിനെതിരെ പരാതി കൊടുക്കാൻ യുവതിയെ പ്രേരിപ്പിച്ചു എന്നതിനുള്ള തെളിവുകൾ പെൻഡ്രൈവിൽ നൽകിയിട്ടുണ്ട് എന്നാണ് റിപ്പോർട്ട്.
ഗർഭഛിദ്രം യുവതി സ്വന്തം ഇഷ്ടപ്രകാരമാണ് നടത്തിയത് എന്ന് സ്ഥാപിക്കാനുള്ള രേഖകളും രാഹുൽ സമർപ്പിച്ചിട്ടുണ്ട്. ബലാത്സംഗം നടന്നെന്ന് പറയുന്ന കാലത്ത് യുവതി ഭർത്താവിനൊപ്പമാണ് താമസിച്ചത് എന്നതിനുള്ള തെളിവുകളും രേഖകളിൽ ഉൾപ്പെടുന്നു എന്നാണ് വിവരം. പോലീസ് കേസെടുത്തതിന് പിന്നാലെ ഒളിവിൽ പോവുകയായിരുന്നുവെന്ന് കരുതപ്പെടുന്ന രാഹുൽ, മുൻകൂർ ജാമ്യ ഹർജി നൽകാനാണ് തലസ്ഥാനത്ത് എത്തിയത്.
തിരുവനന്തപുരം വഞ്ചിയൂരിലെ അഭിഭാഷകന്റെ ഓഫീസിലെത്തി രാഹുൽ നേരിട്ടാണ് വക്കാലത്തിൽ ഒപ്പിട്ടതെന്ന് അഭിഭാഷകൻ വ്യക്തമാക്കി. രാഹുലിനെ പിടികൂടാൻ പോലീസ് അന്വേഷണം ഊർജിതമാക്കിയിരുന്നു. ഇതിന്റെ ഭാഗമായി ലുക്കൗട്ട് സർക്കുലറും പുറപ്പെടുവിച്ചിരുന്നു. തിരുവനന്തപുരത്ത് എത്തിയശേഷം രാഹുൽ പിന്നീട് എങ്ങോട്ട് പോയെന്ന കാര്യത്തിൽ വിവരമില്ല. രാഹുലിന്റെ മുൻകൂർ ജാമ്യാപേക്ഷ തിരുവനന്തപുരം സെഷൻസ് കോടതി ബുധനാഴ്ച പരിഗണിക്കും.
നേരത്തെ തിങ്കളാഴ്ച ഹർജി പരിഗണിക്കുമെന്നായിരുന്നു സൂചനയെങ്കിലും ഇത് ബുധനാഴ്ചത്തേക്ക് മാറ്റുകയായിരുന്നു. ബുധനാഴ്ച ജാമ്യം ലഭിക്കുമോ എന്ന കാര്യത്തിൽ വ്യക്തതയില്ലാത്തതിനാൽ, രാഹുലിന്റെ അറസ്റ്റ് ഉടൻ ഉണ്ടാകുമോയെന്നാണ് രാഷ്ട്രീയ കേരളം ഉറ്റുനോക്കുന്നത്.
ബലാത്സംഗ പരാതിയിൽ പരാതിക്കാരിയുടെ മൊഴിയുടെ കൂടുതൽ വിവരങ്ങൾ പുറത്തുവന്നിട്ടുണ്ട്. രാഹുൽ മാങ്കൂട്ടത്തിലിന്റെ ജാമ്യ ഹർജിയിലെ പ്രധാന വാദങ്ങളെ പൊളിക്കുന്നതാണ് യുവതിയുടെ നിർണ്ണായക മൊഴി. യുവതിയുടെ ആദ്യ വിവാഹം 2024 ഓഗസ്റ്റ് 22-ന് ക്ഷേത്രത്തിൽ വെച്ചാണ് നടന്നത്. ഇത് നിയമപരമായി രജിസ്റ്റർ ചെയ്തിട്ടില്ല. വിവാഹബന്ധം നാല് ദിവസം മാത്രമാണ് ഒരുമിച്ച് താമസിച്ചതെന്നും ഒരു മാസത്തിനുള്ളിൽ ബന്ധം ഒഴിഞ്ഞുവെന്നും യുവതി മൊഴി നൽകി. യുവതിയുടെ മൊഴി രാഹുലിന് കുരുക്കായി. വിവാഹ വാഗ്ദാനം നൽകിയതിനെത്തുടർന്നാണ് ഗർഭം ധരിച്ചതെന്ന് യുവതി പോലീസിന് മൊഴി നൽകി.
"വിവാഹബന്ധം വേർപെടുത്തിയതിനാൽ വീട്ടുകാർ വിവാഹത്തിന് സമ്മതിക്കില്ല. എന്നാൽ, ഒരു കുഞ്ഞുണ്ടെങ്കിൽ വീട്ടിൽ വിവാഹത്തിന് സമ്മതിക്കും എന്ന് രാഹുൽ വിശ്വസിപ്പിച്ചു. ഇത് കാരണമാണ് ഗർഭം ധരിച്ചത്," എന്നാണ് യുവതി അന്വേഷണ സംഘത്തോട് വെളിപ്പെടുത്തിയത്. ഈ മൊഴി രാഹുലിന്റെ മുൻകൂർ ജാമ്യാപേക്ഷയിലെ വാദങ്ങളെ പൂർണ്ണമായും പൊളിക്കുന്നതാണ്. രാഹുലുമായി ബന്ധപ്പെടുന്നതിന് മുൻപുള്ള തന്റെ വിവാഹബന്ധത്തെക്കുറിച്ചും യുവതി നിർണായക വിവരങ്ങൾ നൽകിയിട്ടുണ്ട്.വിവാഹബന്ധം ഒഴിഞ്ഞ് അഞ്ച് മാസങ്ങൾക്ക് ശേഷമാണ് രാഹുലുമായി പരിചയപ്പെട്ടതെന്നും യുവതിയുടെ മൊഴിയിൽ പറയുന്നു.
'വിവാഹിതയ്ക്ക് എങ്ങനെ വിവാഹ വാഗ്ദാനം നൽകും' എന്ന രാഹുലിന്റെ വാദത്തെയും 'ഭർത്താവിരിക്കെയാണ് യുവതി രാഹുലുമായി ബന്ധപ്പെട്ടത്' എന്ന ആരോപണത്തെയും തള്ളിക്കളയുന്നതാണ് യുവതിയുടെ ഈ വിശദമായ മൊഴി. എം.എൽ.എ.യുടെ മുൻകൂർ ജാമ്യാപേക്ഷ ബുധനാഴ്ച തിരുവനന്തപുരം സെഷൻസ് കോടതി പരിഗണിക്കാനിരിക്കെ, കേസിൽ പോലീസിന്റെ അറസ്റ്റ് ഉൾപ്പെടെയുള്ള തുടർനടപടികൾ നിർണായകമാകും.