കോട്ടയം : നീതികരിക്കാനാകാത്ത രാഷ്ട്രീയ വേട്ടയാണ് ഉമ്മൻ ചാണ്ടി നേരിട്ടതെന്ന് പറഞ്ഞ് രാഹുൽ ഗാന്ധി. ഇത് ക്രൂരമായ ക്രിമിനൽ വേട്ടയാണെന്നാണ് അദ്ദേഹം പറഞ്ഞത്. അപ്പോൾ പോലും അദ്ദേഹം ആരെയും കുറ്റപ്പെടുത്തി സംസാരിച്ചിട്ടില്ല എന്നും അദ്ദേഹം ചൂണ്ടിക്കാട്ടി. രാഹുൽ ഗാന്ധി പുതുപ്പള്ളിയിലെ ഉമ്മൻ ചാണ്ടി അനുസ്മരണ യോഗത്തിൽ പങ്കെടുത്ത് സംസാരിക്കുകയായിരുന്നു.(Rahul Gandhi pays tribute to late Oommen Chandy at his grave)
കോൺഗ്രസ് നേതാവ് രാഹുൽ ഗാന്ധി വെള്ളിയാഴ്ച പുതുപ്പള്ളി സെന്റ് ജോർജ് പള്ളിയിലെ ഉമ്മൻ ചാണ്ടിയുടെ ശവകുടീരത്തിൽ ആദരാഞ്ജലി അർപ്പിച്ചു. അദ്ദേഹത്തിൻ്റെ ശവകുടീരത്തിൽ പുഷ്പാർച്ചന നടത്തി മെഴുകുതിരി കത്തിച്ചു പ്രാർത്ഥിച്ചു.
തുടർന്ന്, അദ്ദേഹം പള്ളി സന്ദർശിച്ച് മുൻ മുഖ്യമന്ത്രിയുടെ രണ്ടാം ചരമവാർഷികത്തോടനുബന്ധിച്ച് അദ്ദേഹത്തിന്റെ ജന്മനാടായ പുതുപ്പള്ളിയിൽ പാർട്ടി സംഘടിപ്പിച്ച അനുസ്മരണ യോഗത്തിന്റെ വേദിയിലേക്ക് പോയി.
രാഹുലിനൊപ്പം കെ സി വേണുഗോപാലടക്കമുള്ളവർ ഉണ്ടായിരുന്നു. ഉമ്മൻ ചാണ്ടിയുടെ കുടുംബാംഗങ്ങളും ചടങ്ങിൽ പങ്കെടുത്തു. കെ പി സി സി നടത്തുന്ന സ്‌മൃതി സംഗമം രാഹുൽ ഗാന്ധി ഉദ്ഘാടനം ചെയ്തു. ഉമ്മൻ ചാണ്ടി ഫൗണ്ടേഷൻ നിർമ്മിച്ച് നൽകുന്ന 12 വീടുകളെ താക്കോൽദാന ചടങ്ങും ഇന്ന് നടക്കും. പരിപാടി ഉച്ചയ്ക്ക് 12.30ഓടെ പൂർത്തിയാകും.