കോഴിക്കോട്: വരാനിരിക്കുന്ന നിയമസഭാ തിരഞ്ഞെടുപ്പിൽ ബേപ്പൂർ മണ്ഡലത്തിൽ യുഡിഎഫ് സ്ഥാനാർത്ഥിയായി മുൻ എംഎൽഎ പി.വി. അൻവർ (P.V. Anwar) മത്സരിക്കും. മണ്ഡലത്തിൽ ഇതിനോടകം തന്നെ സജീവമായ അൻവർ, യുഡിഎഫിലെ പ്രമുഖ നേതാക്കളുമായി കൂടിക്കാഴ്ച നടത്തിക്കഴിഞ്ഞു. കോൺഗ്രസ്, ലീഗ് പ്രാദേശിക നേതൃത്വങ്ങൾക്കും സമുദായ നേതാക്കൾക്കും ഒപ്പം തിരഞ്ഞെടുപ്പ് മുന്നൊരുക്കങ്ങൾ ചർച്ച ചെയ്യുന്നതിനായി അദ്ദേഹം മണ്ഡലത്തിൽ സന്ദർശനം നടത്തി.
തിരഞ്ഞെടുപ്പിന് മുന്നോടിയായി ബേപ്പൂരിലെ രാഷ്ട്രീയ സാഹചര്യം വിലയിരുത്തുന്നതിനൊപ്പം അനൗപചാരിക പ്രചാരണ പരിപാടികൾക്കും അൻവർ തുടക്കം കുറിച്ചിട്ടുണ്ട്. യുഡിഎഫ് നേതൃത്വവുമായി നടത്തിയ ചർച്ചയിൽ തനിക്ക് പുറമെ മറ്റ് രണ്ട് സീറ്റുകൾ കൂടി അൻവർ ആവശ്യപ്പെട്ടിട്ടുണ്ട്. പൂഞ്ഞാറിൽ സജി മഞ്ഞക്കടമ്പനെയും തൃക്കരിപ്പൂരിൽ നിസാർ മേത്തറെയും സ്ഥാനാർത്ഥികളാക്കണമെന്നാണ് അദ്ദേഹത്തിന്റെ ആവശ്യം.
അൻവറിന്റെ ബേപ്പൂർ സ്ഥാനാർത്ഥിത്വത്തിൽ ഏകദേശ ധാരണയായിട്ടുണ്ടെങ്കിലും, അധികമായി ആവശ്യപ്പെട്ട സീറ്റുകളുടെ കാര്യത്തിൽ യുഡിഎഫ് നേതൃത്വം ഇതുവരെ അന്തിമ തീരുമാനം എടുത്തിട്ടില്ല. എൽഡിഎഫിന്റെ ഉറച്ച കോട്ടകളിൽ ഒന്നായ ബേപ്പൂർ തിരിച്ചുപിടിക്കാൻ അൻവറിനെപ്പോലൊരു സ്വതന്ത്ര വ്യക്തിത്വം സഹായിക്കുമെന്നാണ് യുഡിഎഫിലെ ഒരു വിഭാഗത്തിന്റെ പ്രതീക്ഷ. വരും ദിവസങ്ങളിൽ മുന്നണിക്കുള്ളിൽ സീറ്റ് വിഭജന ചർച്ചകൾ പൂർത്തിയാകുന്നതോടെ ഔദ്യോഗിക പ്രഖ്യാപനം ഉണ്ടാകും.
Former MLA P.V. Anwar is set to contest as the UDF candidate for the Beypore constituency in the upcoming assembly elections. He has already begun informal campaigning and has held discussions with key Congress and Muslim League leaders to assess the local political landscape. While his candidacy for Beypore is almost certain, the UDF leadership is yet to finalize his demands for additional seats in Poonjar and Trikaripur for his close associates.