പാലക്കാട്: ലൈംഗികാതിക്രമ പരാതി നേരിടുന്ന പാലക്കാട് എം.എൽ.എ. രാഹുൽ മാങ്കൂട്ടത്തിലിന്റെ കുന്നത്തൂർ മേടിലുള്ള ഫ്ലാറ്റിലെ പ്രാഥമിക പരിശോധന പ്രത്യേക അന്വേഷണ സംഘം പൂർത്തിയാക്കി. പരമാവധി തെളിവുകൾ ശേഖരിക്കുന്നതിനായി ഇന്നലെ രാത്രി തന്നെ തിരുവനന്തപുരത്തുനിന്നുള്ള സംഘം പാലക്കാട് എത്തിയിരുന്നു. ഫ്ലാറ്റിലെ സുരക്ഷാ ജീവനക്കാരുടെ മൊഴി അന്വേഷണ സംഘം രേഖപ്പെടുത്തിയിട്ടുണ്ട്.(Preliminary inspection of Rahul Mamkootathil's flat completed)
പരിശോധന പൂർത്തിയാക്കിയ ശേഷം ഉദ്യോഗസ്ഥർ പാലക്കാട് ജില്ലാ ക്രൈംബ്രാഞ്ച് ആസ്ഥാനത്ത് എത്തി. നിലവിൽ ജില്ലയിലെ ഉദ്യോഗസ്ഥരുമായി കേസുമായി ബന്ധപ്പെട്ട കൂടിയാലോചനകൾ നടക്കുകയാണ്. ബലാത്സംഗ കേസിൽ ഒളിവിലുള്ള രാഹുൽ മാങ്കൂട്ടത്തിലിനെ ഉടൻ അറസ്റ്റ് ചെയ്യാനുള്ള നീക്കങ്ങൾ പോലീസ് ശക്തമാക്കി. മുൻകൂർ ജാമ്യാപേക്ഷ സമർപ്പിച്ചിരിക്കുന്നത് അറസ്റ്റിന് തടസ്സമല്ലെന്നാണ് പോലീസ് വൃത്തങ്ങൾ ചൂണ്ടിക്കാട്ടുന്നത്.
എല്ലാ ജില്ലകളിലും അന്വേഷണം നടത്താൻ ക്രമസമാധാന ചുമതലയുള്ള എ.ഡി.ജി.പി. നിർദ്ദേശം നൽകിയിട്ടുണ്ട്. രാഹുൽ തലസ്ഥാനത്തെത്തി വക്കാലത്തിൽ ഒപ്പിട്ടുവെന്ന അഭിഭാഷകന്റെ അവകാശവാദം പോലീസ് തള്ളി. രാഹുൽ ഒപ്പിട്ട മുൻകൂർ ജാമ്യ ഹർജിയുടെ പകർപ്പ് പുറത്തുവന്നിരുന്നു. രാഹുൽ എവിടെയാണെന്ന വിവരം ഇതുവരെ വ്യക്തമായിട്ടില്ല. ഇയാൾ കോയമ്പത്തൂരിൽ ആണെന്ന സംശയവും ഉണ്ട്. വിദേശത്തേക്ക് കടക്കുന്നത് തടയാൻ പോലീസ് നേരത്തെ ലുക്ക്ഔട്ട് സർക്കുലറും പുറത്തിറക്കിയിരുന്നു.
പരാതിക്കാരിയുമായി പീഡനം നടന്ന ഫ്ലാറ്റിലെത്തി പോലീസ് മഹസ്സർ രേഖപ്പെടുത്തി. ഇന്ന് കൂടുതൽ സാക്ഷികളുടെ മൊഴിയെടുക്കും. ഇതിനിടെ, ലൈംഗിക പീഡന കേസിൽ പരാതിക്കാരിയായ യുവതിക്കെതിരെ രാഹുൽ മാങ്കൂട്ടത്തിൽ ഇന്നലെ കൂടുതൽ തെളിവുകൾ തിരുവനന്തപുരം ജില്ലാ കോടതിയിൽ സമർപ്പിച്ചിരുന്നു. ഒമ്പത് തെളിവുകളാണ് സീൽഡ് കവറിലായി കോടതിയിൽ നൽകിയത്.
യുവതി ജോലി ചെയ്തിരുന്ന ചാനലിന്റെ മേധാവി രാഹുലിനെതിരെ പരാതി കൊടുക്കാൻ പ്രേരിപ്പിച്ചു. ഗർഭഛിദ്രം യുവതി സ്വന്തം ഇഷ്ടപ്രകാരമാണ് നടത്തിയത്. ബലാത്സംഗം നടന്നെന്ന് പറയുന്ന കാലയളവിൽ യുവതി ഭർത്താവിനൊപ്പമാണ് കഴിഞ്ഞിരുന്നത്. ഇതുമായി ബന്ധപ്പെട്ട രേഖകളാണ് രാഹുൽ കോടതിയിൽ നൽകിയതെന്നാണ് വിവരം.