തിരുവനന്തപുരം: തിരഞ്ഞെടുപ്പ് ഡ്യൂട്ടിക്ക് നിയോഗിക്കപ്പെട്ട സമ്മതിദായകർക്കുള്ള പോസ്റ്റൽ ബാലറ്റ് വിതരണം നവംബർ 26-ന് ആരംഭിക്കും. ഉത്തരവിൻ്റെ ശരിപ്പകർപ്പ് സഹിതം അപേക്ഷിക്കുന്നവർക്ക് പോസ്റ്റൽ ബാലറ്റുകൾ നൽകണമെന്ന് സംസ്ഥാന തിരഞ്ഞെടുപ്പ് കമ്മീഷൻ വരണാധികാരികൾക്ക് നിർദ്ദേശം നൽകി.
പ്രധാന നിർദ്ദേശങ്ങൾ
തിരഞ്ഞെടുപ്പ് ഡ്യൂട്ടിയിൽ ഏർപ്പെടുന്ന ജീവനക്കാർക്കുള്ള ഉത്തരവ് ബന്ധപ്പെട്ട ജില്ലാ തിരഞ്ഞെടുപ്പ് ഉദ്യോഗസ്ഥർ, ജില്ലാ പോലീസ് മേധാവികൾ, വരണാധികാരികൾ, ഉപവരണാധികാരികൾ എന്നിവർ യഥാസമയം പുറപ്പെടുവിക്കണം.
ബാലറ്റുകളുടെ എണ്ണം:
ത്രിതല പഞ്ചായത്തുകൾ: 3 ബാലറ്റുകൾ (ഗ്രാമം, ബ്ലോക്ക്, ജില്ല).
മുനിസിപ്പാലിറ്റി/കോർപ്പറേഷൻ: ഓരോ ബാലറ്റ് വീതം.
പോസ്റ്റൽ ബാലറ്റിന് അർഹതയുള്ളവർ
തിരഞ്ഞെടുപ്പ് ഡ്യൂട്ടിക്ക് നിയോഗിക്കപ്പെടുന്ന താഴെ പറയുന്ന ഉദ്യോഗസ്ഥർക്ക് പോസ്റ്റൽ ബാലറ്റിനായി അപേക്ഷിക്കാം:
പോളിംഗ് സ്റ്റേഷനിലെ ഡ്യൂട്ടിയിലുള്ളവർ.
തിരഞ്ഞെടുപ്പുമായി ബന്ധപ്പെട്ട മറ്റ് പ്രവർത്തനങ്ങളിൽ ഏർപ്പെടുന്ന സംസ്ഥാന തിരഞ്ഞെടുപ്പ് കമ്മീഷനിലെ മുഴുവൻ ജീവനക്കാർ.
ജില്ലാ തിരഞ്ഞെടുപ്പ് ഓഫീസുകളിലെയും തദ്ദേശ സ്ഥാപനങ്ങളിലെയും (പഞ്ചായത്ത്, മുനിസിപ്പാലിറ്റി, കോർപ്പറേഷൻ) ഇലക്ഷൻ വിഭാഗം ജീവനക്കാർ.
വരണാധികാരി, ഉപവരണാധികാരി എന്നിവരുടെ ഓഫീസുകളിലെ ഇലക്ഷൻ വിഭാഗം ജീവനക്കാർ.
ഒബ്സർവർമാർ, സെക്ടറൽ ഓഫീസർമാർ.
ആന്റി ഡിഫെയ്‌സ്‌മെൻ്റ് സ്‌ക്വാഡിലെ ഉദ്യോഗസ്ഥർ.
തിരഞ്ഞെടുപ്പ് സുരക്ഷാ ചുമതലകളിൽ നിയോഗിക്കപ്പെടുന്ന പോലീസ് ഉദ്യോഗസ്ഥർ.
അപേക്ഷിക്കേണ്ട രീതി
ഡ്യൂട്ടിയിലുള്ള വോട്ടർമാർ പോസ്റ്റൽ ബാലറ്റിനായി ഫാറം 15-ൽ ബന്ധപ്പെട്ട വരണാധികാരിക്ക് അപേക്ഷ നൽകണം.
അപേക്ഷാ ഫാറം വരണാധികാരിയുടെ ഓഫീസിലും സംസ്ഥാന തിരഞ്ഞെടുപ്പ് കമ്മീഷൻ്റെ വെബ്സൈറ്റിലും (https://sec.kerala.gov.in/) ലഭ്യമാണ്.അപേക്ഷ വോട്ടെടുപ്പിന് ഏറ്റവും കുറഞ്ഞത് 7 ദിവസം മുൻപോ അല്ലെങ്കിൽ വരണാധികാരിക്ക് അനുവദിക്കാവുന്ന കുറഞ്ഞ കാലാവധിക്ക് മുൻപോ ലഭിക്കത്തക്കവിധം അയക്കുകയോ, നേരിട്ട് നൽകുകയോ ചെയ്യാം. നേരിട്ട് നൽകുമ്പോൾ ഐഡൻ്റിറ്റി തെളിയിക്കണം.
ത്രിതല പഞ്ചായത്തുകളിലേക്ക് ഓരോ വരണാധികാരിക്കും പ്രത്യേകം അപേക്ഷകൾ നൽകണം. ഇവ ഒരു കവറിലാക്കി ഏതെങ്കിലും ഒരു വരണാധികാരിക്ക് നൽകിയാൽ മതി.
ബാലറ്റ് വിതരണം
പോസ്റ്റൽ ബാലറ്റ് പേപ്പറുകൾക്കൊപ്പം ഫാറം 16 ലെ സത്യപ്രസ്താവന, ഫാറം 17 ലെ നിർദ്ദേശങ്ങൾ, ഫാറം 18 ലെ ചെറിയ കവറുകൾ, ഫാറം 19 ലെ വലിയ കവറുകൾ എന്നിവയെല്ലാം ചേർത്ത് ഒരു വലിയ കവറിലാക്കി അപേക്ഷകന് നേരിട്ടോ സ്പീഡ് പോസ്റ്റായോ നൽകും. (മുനിസിപ്പാലിറ്റികളിലും കോർപ്പറേഷനുകളിലും ഇവയെല്ലാം ഒന്നു വീതമാണ് നൽകുക).