തിരുവനന്തപുരം: പ്രധാനമന്ത്രി നരേന്ദ്ര മോദി ഈ മാസം 23-ന് കേരളത്തിലെത്തും. ഏകദേശം രണ്ട് മണിക്കൂർ സമയം തലസ്ഥാനത്ത് ചെലവഴിക്കുന്ന അദ്ദേഹം റെയിൽവേയുടെയും ബിജെപിയുടെയും പരിപാടികളിൽ ഒരേ വേദിയിൽ വെച്ച് പങ്കെടുക്കും. സന്ദർശനത്തിന്റെ ഭാഗമായി തിരുവനന്തപുരം നഗരത്തിൽ കനത്ത സുരക്ഷാ ക്രമീകരണങ്ങളാണ് ഒരുക്കുന്നത്.(PM Narendra Modi will visit Kerala on the 23rd of this month)
രാവിലെ 10:30-ഓടെ പ്രധാനമന്ത്രി തിരുവനന്തപുരത്ത് എത്തും. രാവിലെ 10:45 മുതൽ 11:20 വരെ കിഴക്കേക്കോട്ട പുത്തരിക്കണ്ടം മൈതാനത്ത് നടക്കുന്ന റെയിൽവേയുടെ ഔദ്യോഗിക ചടങ്ങിൽ അദ്ദേഹം പങ്കെടുക്കും. നാല് പുതിയ ട്രെയിനുകളുടെ ഫ്ലാഗ് ഓഫ് കർമ്മവും വിവിധ റെയിൽവേ വികസന പദ്ധതികളുടെ ഉദ്ഘാടനവും പ്രധാനമന്ത്രി നിർവ്വഹിക്കും.
റെയിൽവേയുടെ ചടങ്ങിന് പിന്നാലെ അതേ വേദിയിൽ വെച്ച് തന്നെ ബിജെപി സംഘടിപ്പിക്കുന്ന രാഷ്ട്രീയ പരിപാടിയിലും അദ്ദേഹം സംബന്ധിക്കും. ബിജെപി ഭരണം കൈയാളുന്ന തിരുവനന്തപുരം കോർപ്പറേഷന്റെ വികസനം ലക്ഷ്യമിട്ടുള്ള 'തലസ്ഥാന വികസന പദ്ധതി' പ്രധാനമന്ത്രി ഈ ചടങ്ങിൽ പ്രഖ്യാപിക്കും.
രണ്ട് മണിക്കൂർ നീളുന്ന പരിപാടികൾക്ക് ശേഷം ഉച്ചയ്ക്ക് 12:40-ഓടെ പ്രധാനമന്ത്രി തിരുവനന്തപുരത്ത് നിന്ന് ചെന്നൈയിലേക്ക് തിരിക്കും. ബിജെപി ഭരണത്തിലുള്ള തിരുവനന്തപുരം കോർപ്പറേഷനായി പ്രധാനമന്ത്രി നേരിട്ട് വികസന പദ്ധതികൾ പ്രഖ്യാപിക്കുന്നത് രാഷ്ട്രീയപരമായും ഏറെ ശ്രദ്ധേയമാണ്.