തിരുവനന്തപുരം: സി പി എം നേതാവ് പി കെ ശശി കെ ടി ഡി സി ചെയർമാൻ സ്ഥാനം രാജിവയ്ക്കില്ലെന്ന് പറഞ്ഞ് രംഗത്ത്. അദ്ദേഹത്തിൻ്റെ മാധ്യമങ്ങളോടുള്ള പ്രതികരണം രാജി വയ്ക്കാനല്ലല്ലോ, ചെയർമാൻ സ്ഥാനത്ത് ഇരിക്കാനല്ലേ പാർട്ടി പറഞ്ഞതെന്നായിരുന്നു.
തിരുവനന്തപുരത്ത് എത്തിയത് കെ ടി ഡി സിയുമായി ബന്ധപ്പെട്ട ചില കാര്യങ്ങൾ ചെയ്യാൻ വേണ്ടിയാണെന്ന് പറഞ്ഞ പി കെ ശശി, ബാക്കിയെല്ലാം കൽപ്പിത കഥകളാണെന്നും കൂട്ടിച്ചേർത്തു. തനിക്ക് പാർട്ടി നടപടി വിശദീകരിക്കേണ്ട ബാധ്യതയില്ലെന്ന് അറിയിച്ച അദ്ദേഹം, താൻ പാര്‍ട്ടി വിഷയം മാധ്യമങ്ങളുമായി ചര്‍ച്ച ചെയ്യാനില്ലെന്നും പ്രതികരിച്ചു.
തനിക്കെതിരെ പാർട്ടി നടപടി ഉണ്ടോ ഇല്ലയോ എന്ന് ഉത്തരവാദിത്തപ്പെട്ടവർ അറിയിക്കുമെന്ന് പറഞ്ഞ അദ്ദേഹം, പുറത്ത് വരുന്ന വാര്‍ത്തയുടെ 'അച്ഛന്‍' ആരാണെന്ന് കണ്ടെത്തണമെന്നും പറഞ്ഞു.
കഴിഞ്ഞ ദിവസം സി പി എം ജില്ലാ കമ്മിറ്റി പി കെ ശശിക്കെതിരായ അന്വേഷണ റിപ്പോർട്ട് അംഗീകരിച്ചത് മണിക്കൂറുകൾ നീണ്ട ചർച്ചയ്‌ക്കൊടുവിലായിരുന്നു. റിപ്പോർട്ടിൽ ശശിക്കെതിരായി ഉള്ളത് വലിയ കണ്ടെത്തലുകളാണ്. പാർട്ടി ഓഫീസ് നിർമ്മാണഫണ്ടിൽ നിന്നും സമ്മേളന ഫണ്ടിൽ നിന്നും സ്വന്തം അക്കൗണ്ടിലേക്ക് 20 ലക്ഷം രൂപ മാറ്റിയതും, ബിനാമി സ്വത്തുക്കൾ സമ്പാദിച്ചതും ഇതിൽ ഉൾപ്പെടുന്നു.
പുത്തലത്ത് ദിനേശൻ അധ്യക്ഷനായ അന്വേഷണ കമ്മീഷൻറേതാണ് കണ്ടെത്തൽ. ശശിയുടേത് കമ്മ്യൂണിസ്റ്റിന് നിരക്കാത്ത ജീവിതശൈലിയാണ് എന്നാണ് കമ്മീഷൻ പറയുന്നത്.