തിരുവനന്തപുരം: മാറാട് കലാപത്തെയും വർഗീയതയെയും കുറിച്ച് സി.പി.എം കേന്ദ്രകമ്മിറ്റി അംഗം എ.കെ. ബാലൻ നടത്തിയ പരാമർശങ്ങളെ മുഖ്യമന്ത്രി പിണറായി വിജയൻ പിന്തുണച്ചു. യുഡിഎഫ് അധികാരത്തിൽ വന്നാൽ കേരളത്തിലെ ആഭ്യന്തര വകുപ്പ് ജമാഅത്തെ ഇസ്ലാമിയുടെ നിയന്ത്രണത്തിലാകുമെന്നും അത് പഴയകാല വർഗീയ കലാപങ്ങൾ ആവർത്തിക്കാൻ കാരണമാകുമെന്നുമുള്ള ബാലന്റെ പ്രസ്താവന, യുഡിഎഫിന്റെ മുൻകാല സമീപനങ്ങൾക്കുള്ള മുന്നറിയിപ്പാണെന്ന് മുഖ്യമന്ത്രി പറഞ്ഞു.
മാറാട് കലാപവും ആർഎസ്എസ് നിലപാടും
മാറാട് കലാപകാലത്ത് യുഡിഎഫ് സർക്കാർ വർഗീയ ശക്തികൾക്ക് മുന്നിൽ മുട്ടുമടക്കിയതിന് മുഖ്യമന്ത്രി ഉദാഹരണങ്ങൾ നിരത്തി. മാറാട് കലാപസ്ഥലം സന്ദർശിക്കാൻ അന്നത്തെ മുഖ്യമന്ത്രി എ.കെ. ആന്റണി എത്തിയപ്പോൾ, മുസ്ലിം ലീഗ് നേതാവ് പി.കെ. കുഞ്ഞാലിക്കുട്ടി കൂടെ വരാൻ പാടില്ലെന്ന് ആർഎസ്എസ് നിബന്ധന വെച്ചു. അത് അനുസരിച്ചാണ് യുഡിഎഫ് നീങ്ങിയത്. എന്നാൽ അന്ന് പാർട്ടി ഭാരവാഹിയായിരുന്ന താൻ ആരുടെയും അനുമതിയില്ലാതെയാണ് മാറാട് സന്ദർശിച്ചതെന്ന് മുഖ്യമന്ത്രി ഓർമിപ്പിച്ചു.
കോൺഗ്രസ് നേതാക്കളെ ഓർമ്മിപ്പിച്ച് മുഖ്യമന്ത്രി
കോൺഗ്രസ് നേതാക്കൾ മുൻപ് സ്വീകരിച്ച നിലപാടുകൾ ഇന്ന് അവർക്ക് വിനയാകുകയാണെന്ന് മുഖ്യമന്ത്രി ചൂണ്ടിക്കാട്ടി. ന്യൂനപക്ഷങ്ങൾ സംഘടിതശക്തി ഉപയോഗിച്ച് സർക്കാരിനെ വിലപേശുന്നു എന്ന് ആക്ഷേപിച്ചാണ് ആന്റണി അന്ന് രാജിവെച്ചത്. മുസ്ലിം ലീഗിന് കൂടുതൽ സീറ്റ് നൽകുന്നതിനെ എതിർത്ത സി.കെ. ഗോവിന്ദൻ നായരുടെ നിലപാടിനെ മുൻപ് പിന്തുണച്ച ചെന്നിത്തലയാണ് ഇപ്പോൾ ജമാഅത്തെ ഇസ്ലാമിയെ യുഡിഎഫിൽ അണിനിരത്താൻ ശ്രമിക്കുന്നത്. അഞ്ചാം മന്ത്രി സ്ഥാനത്തെയും മലബാറിൽ സ്കൂളുകൾ അനുവദിച്ചതിനെയും വർഗീയമായി വിമർശിച്ച വ്യക്തിയാണ് ഇന്നത്തെ പ്രതിപക്ഷ നേതാവെന്ന് മുഖ്യമന്ത്രി ആരോപിച്ചു.
എൽഡിഎഫ് 3.0 ആത്മവിശ്വാസം
തിരഞ്ഞെടുപ്പ് ഫലം വരുമ്പോൾ കോൺഗ്രസ് അലസിപ്പോകുമെന്നും 100 സീറ്റെന്ന യുഡിഎഫിന്റെ മോഹം 'മലർപ്പൊടിക്കാരന്റെ സ്വപ്നം' മാത്രമാണെന്നും എ.കെ. ബാലൻ നേരത്തെ പരിഹസിച്ചിരുന്നു. ഇത് ശരിവെക്കുന്ന തരത്തിലായിരുന്നു മുഖ്യമന്ത്രിയുടെ പ്രതികരണവും. ഏത് വർഗീയതയെയും കർക്കശമായി നേരിടുന്ന എൽഡിഎഫ് സർക്കാരിന്റെ നിലപാടാണ് കേരളത്തിലെ സമാധാനത്തിന് കാരണമെന്ന് അദ്ദേഹം വ്യക്തമാക്കി.
വർഗീയതയോടുള്ള സമീപനം
ആർഎസ്എസിനെ എതിർക്കുന്നത് ഹിന്ദുക്കളെ എതിർക്കലല്ലെന്നും, ജമാഅത്തെ ഇസ്ലാമിയെയോ എസ്ഡിപിഐയെയോ വിമർശിക്കുന്നത് മുസ്ലിങ്ങൾക്ക് എതിരല്ലെന്നും മുഖ്യമന്ത്രി പറഞ്ഞു. മതനിരപേക്ഷത ശക്തിപ്പെടുത്തിയാൽ മാത്രമേ വർഗീയതയെ നേരിടാനാകൂ എന്നും അദ്ദേഹം കൂട്ടിച്ചേർത്തു.