തിരുവനന്തപുരം: കോൺഗ്രസ് നേതാവ് രമേശ് ചെന്നിത്തല രാഹുൽ മാങ്കൂട്ടത്തിൽ വിഷയത്തിലും ശബരിമല സ്വർണ്ണക്കൊള്ളക്കേസിലും നിലപാടുകൾ വ്യക്തമാക്കി. രാഹുൽ മാങ്കൂട്ടത്തിലിനെ പാർട്ടിയിൽനിന്ന് പുറത്താക്കിയതാണ്. കെ. സുധാകരൻ ഉൾപ്പെടെ എല്ലാവരും ചേർന്ന് എടുത്ത തീരുമാനമായിരുന്നു അത്.(Pinarayi is the god of Padmakumar, says Ramesh Chennithala)
സസ്പെൻഷനിലായ രാഹുൽ എങ്ങനെ പാർട്ടി പരിപാടിയിൽ പങ്കെടുത്തു എന്ന് തനിക്ക് അറിയില്ലെന്നും ഇത് കെ.പി.സി.സി. പരിശോധിക്കേണ്ട കാര്യമാണെന്നും അദ്ദേഹം കൂട്ടിച്ചേർത്തു. രാഹുലിന്റെ ഓഡിയോ സന്ദേശം കേട്ടിട്ടില്ലെന്നും "കേൾക്കേണ്ട ഏർപ്പാടൊന്നും അല്ലല്ലോ" എന്നുമായിരുന്നു ചെന്നിത്തലയുടെ പ്രതികരണം. ഓഡിയോ സന്ദേശത്തിന്റെ പേരിൽ നടപടി എടുത്ത പാർട്ടിയാണ് കോൺഗ്രസ് എന്നും അദ്ദേഹം ഓർമ്മിപ്പിച്ചു.
ശബരിമല സ്വർണ്ണക്കൊള്ളക്കേസിൽ അറസ്റ്റിലായ ദേവസ്വം മുൻ പ്രസിഡന്റ് എ. പത്മകുമാറിനെ അദ്ദേഹം വിമർശിച്ചു. പത്മകുമാർ പറഞ്ഞ ദൈവം പിണറായി വിജയൻ ആയിരിക്കുമെന്നും കൊള്ളയുടെ കാരണഭൂതൻ അദ്ദേഹമാണല്ലോ എന്നും രമേശ് ചെന്നിത്തല കൂട്ടിച്ചേർത്തു. പത്മകുമാറിനും എൻ. വാസുവിനും എതിരെ നടപടിയെടുക്കാൻ സി.പി.എം. സംസ്ഥാന സെക്രട്ടറി എം.വി. ഗോവിന്ദന് ധൈര്യമുണ്ടോ എന്നും അദ്ദേഹം ചോദിച്ചു.
സ്വർണ്ണക്കൊള്ള വിഷയം തിരഞ്ഞെടുപ്പിൽ ഇടതുപക്ഷത്തിന് തിരിച്ചടിയാകുമെന്ന് ചെന്നിത്തല ചൂണ്ടിക്കാട്ടി. യു.ഡി.എഫ്. വലിയ വിജയം നേടുമെന്നും അദ്ദേഹം ആത്മവിശ്വാസം പ്രകടിപ്പിച്ചു.