കൊച്ചി: പെരുമ്പാവൂർ നഗരസഭാധ്യക്ഷയായി തിരഞ്ഞെടുക്കപ്പെട്ട കെ.എൻ. സംഗീത ചുമതലയേൽക്കാൻ രാഹുകാലം കഴിയുന്നതുവരെ കാത്തിരുന്നത് നഗരസഭാ ഓഫീസിൽ അൽപ്പനേരം ആശയക്കുഴപ്പമുണ്ടാക്കി. വെള്ളിയാഴ്ച രാവിലെ സത്യപ്രതിജ്ഞ കഴിഞ്ഞെത്തിയ അധ്യക്ഷ, രാഹുകാലം തടസ്സമായതിനെത്തുടർന്ന് 45 മിനിറ്റോളം പുറത്ത് കാത്തുനിന്ന ശേഷമാണ് സീറ്റിൽ ഇരുന്നത്.
വെള്ളിയാഴ്ച രാവിലെ 11.15-നാണ് സംഗീതയുടെ സത്യപ്രതിജ്ഞാ ചടങ്ങുകൾ പൂർത്തിയായത്. ചടങ്ങിന് ശേഷം ഉദ്യോഗസ്ഥർ അധ്യക്ഷയെ ഔദ്യോഗിക ചേംബറിലേക്ക് സ്വാഗതം ചെയ്തു. എന്നാൽ 12 മണി വരെ രാഹുകാലമാണെന്നും ശുഭമുഹൂർത്തത്തിനായി അതുവരെ കാത്തിരിക്കണമെന്നും സംഗീത നിലപാടെടുത്തു.
അധ്യക്ഷയുടെ തീരുമാനത്തെത്തുടർന്ന് ഉദ്യോഗസ്ഥരും ഓഫീസ് ജീവനക്കാരും പാർട്ടി പ്രവർത്തകരും 45 മിനിറ്റോളം ഓഫീസിന് പുറത്ത് കാത്തുനിൽക്കേണ്ടി വന്നു. ഒടുവിൽ രാഹുകാലം കഴിഞ്ഞതോടെ കൃത്യം 12 മണിക്ക് അവർ ഔദ്യോഗിക കസേരയിൽ ഇരുന്ന് ചുമതലയേറ്റു.
നഗരസഭാ ഭരണാധികാരി എന്ന നിലയിൽ ഔദ്യോഗിക കൃത്യനിർവഹണത്തിന് വിശ്വാസപരമായ കാര്യങ്ങൾ തടസ്സമാകുന്നത് ശരിയാണോ എന്ന തരത്തിൽ സോഷ്യൽ മീഡിയയിലടക്കം ഈ സംഭവം ഇതിനോടകം ചർച്ചയായിട്ടുണ്ട്.