പയ്യന്നൂർ: കുടുംബകലഹം അന്വേഷിക്കാനെത്തിയ പോലീസുകാരെ മർദിച്ച സംഭവത്തിൽ രാമന്തളി കുന്നരു സ്വദേശി ബിജുകുമാറിനെ (43) പയ്യന്നൂർ പോലീസ് അറസ്റ്റ് ചെയ്തു (Payyannur Police Attack). വനിതാ എസ്ഐയ്ക്കും സീനിയർ സിവിൽ പോലീസ് ഓഫീസർക്കുമാണ് ആക്രമണത്തിൽ പരിക്കേറ്റത്.
തന്നെയും മകനെയും ഭർത്താവ് മർദിക്കുന്നുവെന്ന് കാണിച്ച് കാരന്താട് സ്വദേശിയായ യുവതി പോലീസിനെ വിളിക്കുകയായിരുന്നു. ചൊവ്വാഴ്ച രാത്രി ഏഴുമണിയോടെ പരാതി അന്വേഷിക്കാൻ എത്തിയതായിരുന്നു പോലീസ് സംഘം. ഈ സമയം പ്രകോപിതനായ ബിജുകുമാർ സീനിയർ സിവിൽ പോലീസ് ഓഫീസറെ ആക്രമിക്കുകയും തടയാൻ ശ്രമിച്ച വനിതാ എസ്ഐയെ ചവിട്ടി വീഴ്ത്തുകയും ചെയ്തു.
പോലീസ് ഡ്രൈവർ ഓടിയെത്തിയപ്പോഴേക്കും പ്രതി സ്ഥലത്തുനിന്ന് ഓടി രക്ഷപ്പെട്ടു. പരിക്കേറ്റ ഉദ്യോഗസ്ഥരെ പയ്യന്നൂർ താലൂക്ക് ആശുപത്രിയിൽ പ്രവേശിച്ചു.
ആശുപത്രിയിൽ ചികിത്സയിലുള്ള വനിതാ എസ്ഐ നൽകിയ പരാതിയുടെ അടിസ്ഥാനത്തിൽ പോലീസ് നടത്തിയ തെരച്ചിലിലാണ് പ്രതി പിടിയിലായത്. ഔദ്യോഗിക കൃത്യനിർവഹണം തടസ്സപ്പെടുത്തൽ, പോലീസിനെ ആക്രമിക്കൽ തുടങ്ങിയ ഗുരുതരമായ വകുപ്പുകൾ ചുമത്തിയാണ് കേസ് രജിസ്റ്റർ ചെയ്തിരിക്കുന്നത്.
