തിരുവനന്തപുരം : കുട്ടികൾ കലോത്സവത്തിനിടെ അവതരിപ്പിച്ച പലസ്തീൻ അനുകൂല മൈം ഷോയ്ക്ക് അനുമതി നിഷേധിച്ച സംഭവത്തിൽ നടപടി. കാസർഗോഡ് കുമ്പള ഗവ. ഹയര്‍സെക്കന്‍ഡറി സ്കൂളിൽ ആണ് സംഭവം. അംഭവത്തിൽ വിദ്യാഭ്യാസ വകുപ്പ് അന്വേഷണം പ്രഖ്യാപിച്ചു. (Palestine supporting mime show in Kasaragod school )
അടിയന്തരമായി അന്വേഷണ റിപ്പോര്‍ട്ട് ആവശ്യപ്പെട്ടിട്ടുണ്ടെന്നാണ് മന്ത്രി വി ശിവൻകുട്ടി അറിയിച്ചത്. ഇതേ വേദിയിൽ കുമ്പള സ്കൂളിലെ വിദ്യാർത്ഥികൾക്ക് വിഷയം അവതരിപ്പിക്കാൻ അനുമതി നൽകുമെന്നും, പലസ്തീൻ ഐക്യദാർഢ്യം പ്രഖ്യാപിച്ചു ഏതെങ്കിലും ഒരു കലാരൂപം അവതരിപ്പിച്ചാൽ അത് തടയുന്നതും അതിന്‍റെ പേരിൽ യുവജനോത്സവം നിർത്തിവയ്ക്കുന്നതും മര്യാദകേടാണ് എന്നും പറഞ്ഞ അദ്ദേഹം, കർശന നടപടി സ്വീകരിക്കുമെന്നും വ്യക്തമാക്കി.
അധ്യാപകനെതിരെ നടപടി ആവശ്യപ്പെട്ട് MSF, SFI പ്രതിഷേധ മാർച്ച്
പലസ്തീൻ അനുകൂല മൈം ഷോ നടത്തിയതിന് സ്‌കൂൾ കലോത്സവം നിർത്തിച്ച സംഭവത്തിൽ അധ്യാപകനെതിരെ നടപടി എടുക്കണമെന്ന് ആവശ്യപ്പെട്ട് പ്രതിഷേധ മാർച്ചുമായി എം എസ് എഫും എസ് എഫ് ഐയും. കുമ്പള ഗവൺമെന്റ് ഹയർ സെക്കണ്ടറി സ്‌കൂളിലേക്ക് മാർച്ച് നടത്തിയ പ്രതിഷേധക്കാരെ പൊലീസിന് അറസ്റ്റ് ചെയ്ത് നീക്കേണ്ടി വന്നു.
മണിക്കൂറുകളോളം എം എസ് എഫ് പ്രതിഷേധിച്ചു. രാവിലെ സ്കൂളിൽ പി ടി എ യോഗം ചേർന്നിരുന്നു. അധ്യാപകനെതിരെ നടപടി വേണമെന്നാണ് വ്യാപക ആവശ്യം.
പലസ്തീൻ അനുകൂല മൈം ഷോ അവതരിപ്പിച്ചതിന് സ്‌കൂൾ കലോത്സവം നിർത്തിവച്ചത് കാസർഗോഡ് കുമ്പള ഗവ: ഹയർസെക്കൻഡറി സ്‌കൂളിലാണ്. ഇന്നലെയാണ് സംഭാവമുണ്ടായത്. പരിപാടി മുഴുമിപ്പിക്കുന്നതിന് മുൻപായി അധ്യാപകൻ കർട്ടൻ താഴ്ത്തി. ഇന്ന് നടത്താനിരുന്ന കലോത്സവവും മാറ്റിവച്ചു. മൈം അവതരിപ്പിച്ചത് പ്ലസ്‌ടു വിദ്യാർത്ഥികളാണ്. നടപടിയെടുത്ത അധ്യാപകരുടെ പേര് കുട്ടികൾ വെളിപ്പെടുത്തിയിട്ടില്ല. ഇന്നലെ ആറു മണിക്ക് നടന്ന സംഭവത്തിന് ശേഷം കലോത്സവം നിർത്തിവച്ചു.