കണ്ണൂർ: പാലത്തായിയിൽ നാലാം ക്ലാസുകാരിയെ പീഡിപ്പിച്ച കേസിൽ ബിജെപി നേതാവും അധ്യാപകനുമായ കെ. പത്മരാജന് ജീവപര്യന്തം തടവും ശിക്ഷയും വിധിച്ചു, നടപടി തലശ്ശേരി അതിവേഗ പോക്സോ കോടതിയുടേതാണ്. പോക്സോ ആക്ട് പ്രകാരമുള്ള കുറ്റങ്ങളിൽ 40 വർഷം തടവും കോടതി വിധിച്ചിട്ടുണ്ട്.(Palathayi POCSO case, BJP leader K Padmarajan sentenced to life imprisonment and fine)
2020 ജനുവരിക്കും ഫെബ്രുവരിക്കുമിടയിൽ പാലത്തായിലെ 10 വയസ്സുകാരിയെ സ്കൂളിനകത്തും പുറത്തും വെച്ച് മൂന്ന് തവണ ലൈംഗികമായി പീഡിപ്പിച്ചുവെന്നതാണ് കേസ്. ഇന്ത്യൻ ശിക്ഷാ നിയമത്തിലെ 376 എബി, ബലാത്സംഗം, പോക്സോ ആക്ട് പ്രകാരമുള്ള കുറ്റങ്ങൾ എന്നിവയാണ് പ്രതിക്കെതിരെ ചുമത്തിയിരുന്നത്.
2024 ഫെബ്രുവരിയിൽ ആരംഭിച്ച വിചാരണക്കൊടുവിലാണ് കോടതി പ്രതി കുറ്റക്കാരനാണെന്ന് കണ്ടെത്തിയത്. പരമാവധി 20 വർഷം വരെയോ ജീവപര്യന്തമോ ശിക്ഷ ലഭിക്കാവുന്ന കുറ്റങ്ങളാണ് തെളിഞ്ഞത്. പരാതി ലഭിച്ചതിനെ തുടർന്ന് തലശ്ശേരി ഡിവൈഎസ്പി അന്വേഷണം പാനൂർ പോലീസിന് കൈമാറിയെങ്കിലും, ആദ്യഘട്ടത്തിൽ പരാതി വ്യാജമാണെന്നായിരുന്നു പോലീസിൻ്റെ കണ്ടെത്തൽ. പ്രതിക്കെതിരെ നടപടി ആവശ്യപ്പെട്ട് പ്രതിഷേധം ശക്തമായതിന് പിന്നാലെ 2020 ഏപ്രിൽ 15-ന് ഒളിവിൽ കഴിഞ്ഞിരുന്ന പത്മരാജനെ അറസ്റ്റ് ചെയ്തു.
അഞ്ച് തവണ അന്വേഷണ സംഘങ്ങളെ മാറ്റിയതും, ക്രൈംബ്രാഞ്ച് സമർപ്പിച്ച ഇടക്കാല കുറ്റപത്രത്തിൽ 90 ദിവസം തികയുന്നതിന് തൊട്ടുമുമ്പ് പോക്സോ വകുപ്പ് ചുമത്താതിരുന്നതും വലിയ രാഷ്ട്രീയ വിവാദമായിരുന്നു. 2021 മേയിലാണ് കേസിൽ അന്തിമ കുറ്റപത്രം സമർപ്പിച്ചത്. ഇന്നലെ ശിശുദിനത്തിൽ പ്രതി കുറ്റക്കാരനാണെന്ന് കണ്ടെത്തിയതിന് പിന്നാലെ അതിജീവിതയ്ക്ക് നീതി ലഭിച്ചെന്ന് പ്രോസിക്യൂഷൻ പ്രതികരിച്ചിരുന്നു. ഇന്ന് രാവിലെ നടന്ന അവസാന വാദത്തിൽ:
പ്രതിക്ക് പരമാവധി ശിക്ഷ നൽകണമെന്ന് ശക്തമായി ആവശ്യപ്പെട്ടു. കേസ് രാഷ്ട്രീയ പ്രേരിതമാണെന്നും, പ്രതിയുടെ കുടുംബവും പ്രായവും പരിഗണിക്കണമെന്നും ആവശ്യപ്പെട്ടു. പ്രതിയുടെ ഭാര്യ ആത്മഹത്യ ചെയ്യേണ്ടി വന്നാൽ ഉത്തരവാദികൾ മതതീവ്രവാദികൾ ആയിരിക്കുമെന്നും പ്രതിഭാഗം അഭിഭാഷകൻ വാദിച്ചു.
ഭാര്യയും മക്കളും അമ്മയും അടങ്ങുന്ന കുടുംബമാണ് തനിക്കുള്ളതെന്നും ശിക്ഷയിൽ ഇളവ് വേണമെന്നും കോടതിയോട് അപേക്ഷിച്ചു. കേസിൻ്റെ മെറിറ്റാണ് പരിശോധിച്ചതെന്ന് വ്യക്തമാക്കിക്കൊണ്ടാണ് കോടതി ശിക്ഷ വിധിച്ചത്.