പാലക്കാട്: ജില്ലയിലെ കായിക മേഖലയ്ക്ക് പുത്തൻ ഉണർവ് നൽകുന്ന പാലക്കാട് സ്പോർട്സ് ഹബ്ബിന്റെ നിർമ്മാണോദ്ഘാടനം ഫെബ്രുവരി 27-ന് വൈകുന്നേരം 5 മണിക്ക് മന്ത്രി എം.ബി. രാജേഷ് നിർവ്വഹിക്കും (Palakkad Sports Hub). അകത്തേത്തറ എൻഎസ്എസ് എൻജിനീയറിങ് കോളജിന് പിന്നിലായി 21 ഏക്കർ ഭൂമിയിലാണ് ഈ അത്യാധുനിക സ്പോർട്സ് കോംപ്ലക്സ് ഉയരുന്നത്.
30 കോടി രൂപ ചെലവിൽ രണ്ട് ക്രിക്കറ്റ് ഗ്രൗണ്ടുകൾ, ഫ്ലഡ് ലൈറ്റ് സൗകര്യം, ക്ലബ് ഹൗസ്, നീന്തൽക്കുളം, ബാസ്കറ്റ് ബോൾ – ഫുട്ബോൾ മൈതാനങ്ങൾ എന്നിവ ഇവിടെ നിർമ്മിക്കും. അകത്തേത്തറ ശ്രീ ചാത്തൻകുളങ്ങര ഭഗവതി ക്ഷേത്രം ട്രസ്റ്റിന്റെ ഉടമസ്ഥതയിലുള്ള ഭൂമി 33 വർഷത്തെ ലീസ് വ്യവസ്ഥയിലാണ് കെസിഎ ഏറ്റെടുക്കുന്നത്. ഇതുവഴി ക്ഷേത്രത്തിന് പ്രതിവർഷം 21,35,000 രൂപ വരുമാനം ലഭിക്കും.സ്പോർട്സ് ഹബ്ബ് പ്രവർത്തനസജ്ജമാകുന്നതോടെ പ്രാദേശികവാസികൾക്ക് തൊഴിൽ മേഖലയിൽ മുൻഗണന നൽകും.
കെസിഎ പ്രസിഡന്റ് അഡ്വ. ശ്രീജിത്ത് വി. നായർ അറിയിച്ചതനുസരിച്ച് രണ്ട് ഘട്ടങ്ങളിലായാണ് നിർമ്മാണം പൂർത്തിയാക്കുക:
ഒന്നാം ഘട്ടം (2026)- ഗ്രൗണ്ട്, പവലിയൻ, സ്പ്രിംഗ്ളർ സിസ്റ്റം എന്നിവ ഈ വർഷം തന്നെ പൂർത്തിയാക്കും.
രണ്ടാം ഘട്ടം (2027 ഏപ്രിൽ)- ബാക്കി സൗകര്യങ്ങൾ കൂടി സജ്ജമാക്കി പദ്ധതി പൂർണ്ണമായും കായികതാരങ്ങൾക്കായി തുറന്നുകൊടുക്കും.
മന്ത്രി വി.എൻ. വാസവൻ മുഖ്യാതിഥിയാകുന്ന ചടങ്ങിൽ വി.കെ. ശ്രീകണ്ഠൻ എം.പി, എ. പ്രഭാകരൻ എം.എൽ.എ തുടങ്ങിയ പ്രമുഖർ പങ്കെടുക്കും. അന്താരാഷ്ട്ര നിലവാരത്തിലുള്ള പരിശീലന സൗകര്യങ്ങൾ ജില്ലയിലെ ഗ്രാമീണ മേഖലയിലുള്ള പ്രതിഭകൾക്ക് കൂടി ലഭ്യമാക്കുക എന്നതാണ് ഈ സംരംഭത്തിലൂടെ ലക്ഷ്യമിടുന്നതെന്ന് കെസിഎ സെക്രട്ടറി വിനോദ് എസ്. കുമാർ പറഞ്ഞു.
Story Summary: The construction of the state-of-the-art Palakkad Sports Hub by the Kerala Cricket Association (KCA) will be inaugurated on February 27. Spread across 21 acres in Akathethara, the ₹30 crore project includes two cricket grounds, floodlights, a swimming pool, and other sports facilities. Minister M.B. Rajesh will perform the inauguration.
