കണ്ണൂർ: പി ഇന്ദിരയെ കണ്ണൂർ കോർപ്പറേഷൻ്റെ പുതിയ മേയറായി കെ. സുധാകരൻ പ്രഖ്യാപിച്ചു. നിലവിലെ ഡെപ്യൂട്ടി മേയറായ ഇന്ദിരയെ മേയർ സ്ഥാനത്തേക്ക് ഉയർത്താൻ കോൺഗ്രസ് കോർ കമ്മിറ്റി ഐക്യകണ്ഠേന തീരുമാനിക്കുകയായിരുന്നു. കണ്ണൂരിൽ വെച്ച് നടന്ന വാർത്താസമ്മേളനത്തിലാണ് സുധാകരൻ പ്രഖ്യാപനം നടത്തിയത്.(P Indira becomes Kannur Corporation Mayor, K Sudhakaran made the announcement)
മേയർ സ്ഥാനത്തേക്ക് പി. ഇന്ദിരയുടെ പേര് മാത്രമാണ് കോർ കമ്മിറ്റിക്ക് മുന്നിൽ വന്നതെന്ന് കെ. സുധാകരൻ പറഞ്ഞു. പാർട്ടിക്കുള്ളിലെ പൂർണ്ണമായ യോജിപ്പോടെയാണ് ഈ തീരുമാനമെന്നും അദ്ദേഹം വ്യക്തമാക്കി. മേയറായി തിരഞ്ഞെടുക്കപ്പെട്ടതിന് പിന്നാലെ ആവേശകരമായ പ്രതികരണമാണ് പി. ഇന്ദിര നടത്തിയത്.
തന്റെ ജീവിതത്തിൽ പാർട്ടി നൽകിയ ഏറ്റവും വലിയ അംഗീകാരമാണിതെന്ന് അവർ പറഞ്ഞു. കണ്ണൂരിന്റെ മുഖച്ഛായ മാറ്റുന്ന തരത്തിലുള്ള വികസന പ്രവർത്തനങ്ങളുമായി മുന്നോട്ട് പോകും. തങ്ങൾക്കെതിരെ സിപിഎം ഉന്നയിച്ച അഴിമതി ആരോപണങ്ങളെല്ലാം കളവാണെന്ന് തെളിഞ്ഞു. ജനങ്ങൾ ആ ആരോപണങ്ങളെല്ലാം തള്ളിക്കളഞ്ഞതിന്റെ തെളിവാണ് ഈ വിജയമെന്നും അവർ കൂട്ടിച്ചേർത്തു.